29:252  amicis  dabat,  et  in  Domini  conspectu  cum  ipsis  festum  agitabat.  Sic  igitur  Elcana  sacrificii  partes  administrabat.  Liberos  quidem  oportebat  domi  edere  de  sacrificio,  nihilominus  ipsis  matris  aut  aliorum  partes  minime  cedebant.  Sic  Annae  victum  etiam,  ut  aliis,  oportuit  ministrari  licet  seclusae:  sed  tamen  soli  pars  dabatur,  qua  contentam  esse,  et  eandem  alibi  quam  in  Domini  conspectu  edere  oportuit.  Hinc  illius  tristitia,  quod  reliquis  in  Dei  conspectu,  ex  Dei  lege  vescentibus,  illa  quodammodo  exsularet.  Dicuntur  vero  filii  Eli,  quum  Elcana  veniret  ad  sacrificandum  fuisse  sacerdotio  functi.  Quae  verba  notanda  sunt,  nam  deinceps  videbimus  illos  omni  abiecto  pudore  depravatos:  ut  qui  Dei  sanctuarium  in  latrocinia  converterint,  assumptis  contra  Dei  legem  de  sacrificiis  quascumque  voluissent  partibus:  scortationibus  id  infecerint,  stupro  illato  virginibus  quae  adoraturae  convenissent.  Quae  filiorum  Eli  vita  profusa  et  detestanda,  quantum,  quaeso,  Elcanae  et  caeteris  ad  sacrificandum  et  adorandum  Deum  Schiluntem  venientibus,  potuit  offendiculum  ac  fastidium  sacrificiorum  adferre,  quum  eos  viderent  adeo  profusos,  sine  fide,  lege,  conscientia,  Deive  metu,  quos  aliis  omnis  pietatis  et  sanctimoniae  exemplo  praeire  decebat?  Nihilominus  tamen  ab  Elcana  superatum  istud  offendiculum  videmus.  Et  quidem  hoc  observatione  dignum.  Hinc  enim  discendum,  etsi  vitia  in  quibusvis  detestari  nos  oportet,  non  ideo  tamen  resiliendum  a  coetibus,  et  veritate  ac  puro  Dei  cultu,  si  qui  inter  homines  pollent  autoritate  maxime  inquinati  sunt.  Aut  si  verbi  ipsius  ministros  conspexerimus  pro  muneris  sui  dignitate  non  convenienter  ac  decenter  vivere,  non  tamen  a  veritate  doctrinae  recedendum.  Nec  enim  Dei  gloriam  ac  veritatem  a  mortalium  sanctitate  pendere  par  est,  ut  vel  augeatur  vel  minuatur  prout  mortales  sancte  vel  effraenate  vitam  egerint.  Quare  danda  omnis  opera  edoctis  viri  istius  exemplo,  ne  in  nobis  ardor  illo  deferveat,  quo  in  amorem  Dei  ferri  nos  convenit,  licet  totus  collabatur  vitiis  orbis,  ac  quos  bonorum  operum  exemplis  praeire  decebat  vitiis  immersos  atque  indulgentes  conspiciamus:  sed  ut  potius  ab  illis  secessione  facta  quantum  in  nobis  erit  impuram  illorum  vitam  et  exempla  magis  ac  magis  abominemur,  scientes  nos  quo  propius  ad  eos  moribus  accedimus,  eo  longius  a  Deo  recedere.  Nam  licet  maxima  pars  orbis  corrupta  vitiis  ruat,  Dei  tamen  verbum  apud  electos  dignitatem  suam  et  auctoritatem  retinebit.  Caeteris  porro  in  aliud  tempus  reiectis  agite,  fratres,  coram  Dei  nostri  Optimi  Maximi  maiestate,  facti  supplices,  et  peccata  confessi  precemur  ut  in  dies  maiora  faciamus  in  ipsius  timore  incrementa,  quo  nobis  ipsis  et  pravis  omnibus  cupiditatibus  et  affectibus  renuntiantes,  quibus  natura  dediti  sumus,