27:252  despouilles  du  tout  l'amour  que  tu  portes  a  ta  femme,  si  elle  te  veut  desbaucher  de  moy.  Et  puis:  Quand  tu  auras  (dit-il)  un  ami  qui  te  sera  aussi  cher  que  ta  prope  vie,  il  faut  aussi  bien  que  tu  mettes  la  main  dessus  pour  le  lapider:  que  tu  ne  sois  point  seulement  tesmoin  ou  accusateur,  mais  que  tu  viennes  contre  luy  sans  l'espargner,  que  toute  misericorde  ici  soit  iettee  au  loin.  Or  par  cela  nous  voyons  (en  somme)  ce  que  i'ay  dit,  c'est  assavoir  que  Dieu  veut  examiner  si  nous  l'aimons  en  verite.  Et  pour  ceste  cause  il  nous  met  au  devant  tout  ce  qui  nous  pourroit  retenir,  tout  ce  qui  nous  pourroit  rompre  le  courage:  tellement  que  nous  n'eussions  pas  un  tel  zele  comme  nous  devons,  pour  maintenir  son  honneur:  et  nous  declaire.  que  si  nous  sommes  empeschez  de  tousiours  garder  sur  tout  l'union  de  la  foy,  telle  qu'elle  est  contenue  en  sa  parolle,  que  nous  sommes  traistres,  et  desloyaux  envers  luy,  et  qu'il  nous  reiette:  et  au  lieu  de  nous  tenir  pour  ses  enfans,  qu'il  nous  quitte,  et  nous  bannit  de  son  royaume,  et  de  son  Eglise:  car  il  veut  que  cest  ordre  soit  garde  entre  les  siens.  Voila  pour  un  item.  Or  cependant  il  nous  faut  regarder  de  qui  il  parle.  Ii  ne  dit  pas  seulement:  Quand  quelcun  aura  tasche  d'abolir  toute  religion:  comme  nous  en  verrons  des  gens  prophanes,  qui  sont  comme  chiens  et  porceaux,  qui  voudroyent  qu'on  se  mocquast  de  tout  service  de  Dieu:  il  ne  parle  point  de  telles  gens.  Mais  il  dit:  Si  quelcun  par  superstition  te  destourne  pour  te  faire  servir  aux  idoles,  combien  que  ce  soyent  des  dieux  renommez  au  monde,  et  que  les  peuples  qui  sont  a  l'environ  cuident  bien  faire  quand  ils  les  adorent:  si  quelcun  te  veut  divertir  de  ma  parolle,  pour  te  faire  suyvre  apres  ces  dieux-la,  qu'il  soit  extermine.  Or  donc  nous  voyons  que  Dieu  ne  punit  point  seulement  ceux  qui  auront  voulu  aneantir  toute  religion:  mais  ceux  qui  auront  corrompu  la  verite.  Et  ainsi,  pour  bien  comprendre  ceste  Loy  qui  nous  est  donnee,  notons  en  un  mot,  qu'il  n'est  point  question  de  dire:  II  n'y  a  point  de  Dieu,  c'est  une  folle  phantasie,  que  de  se  tormenter  en  quelque  devotion,  car  nous  n'y  gagnerons  rien:  mais  quand  un  homme  sera  devot,  et  qu'il  cuidera  bien  faire,  s'il  ne  cognoist  le  vray  Dieu,  et  qu'il  se  destourne  comme  un  apostat  apres  les  superstitions  des  Payens,  celuy-la  est  condamne.  Et  c'est  une  distinction  que  nous  avons  bien  a  retenir.  Car  nostre  Seigneur  nous  monstre  qu'il  veut  qu'on  se  contente  de  sa  parolle,  pour  y  acquiescer  du  tout,  qu'on  soit  la  bride,  et  qu'on  n'attente  point  de  rien  changer  qui  soit,  quand  il  aura  declaire  par  sa  bouche  ce  qu'il  approuve.  Et  notamment  il  dit:  Les  dieux  que  tu  n9auras  point  cogneu  ni  aussi  tes  peres.  Par  ce  mot  il  remonstre  qu'il