50:251  251  EPIST.  PAULI  AD  GALATAS  252  ut  intelligant  Galatae  praecipuum  christianae  perfectionis  caput  in  ea  situm  esse.  Sed  videndum  est  cur  omnia  legis  praecepta  sub  caritate  comprehendat:  quum  lex  constet  duabus  tabulis,  quarum  prior  docet  de  cultu  Dei  et  pietatis  officiis:  altera  autem  de  caritate.  Nam  absurdum  est  ex  parte  totum  facere.  Quidam  ita  effugiunt,  nihil  aliud  etiam  in  priore  tabula  tradi  quam  ut  Deum  diligamus  ex  toto  corde.  Verum  diserte  Paulus  exprimit  caritatem  erga  proximos.  Quaerenda  igitur  alia  firmior  solutio.  Fateor  pietatem  erga  Deum  fratrum  caritati  praestare:  ideoque  prioris  tabulae  observationem  pluris  fieri  coram  Deo  quam  secundae.  Sed  pietas  res  est  ab  hominum  sensu  abscondita:  sicuti  Deus  ipse  est  invisibilis.  Ad  eam  testificandam  quamvis  institutae  sint  caeremoniae:  non  tamen  certa  sunt  argumenta.  Nam  saepe  fit  ut  nulli  sint  magis  strenui  et  assidui  caeremoniarum  cultores  quam  hypocritae.  Deus  ergo  experimentum  nostri  erga  se  affectus  capere  vult  ex  fraterna  caritate  quam  mutuo  nobis  commendat.  Haec  ratio  est  cur  caritas  vocetur  legis  perfectio,  non  hic  tantum,  sed  etiam  ad  Rom.  13,  8:  non  quia  antecellat  cultum  Dei,  sed  quia  sit  eius  approbatio.  Iam  dixi  Deum  esse  invisibilem:  se  autem  nobis  repraesentat  in  fratribus,  et  in  illorum  persona  quod  sibi  debetur  exigit.  Ergo  caritas  erga  homines  non  nisi  ex  timore  et  amore  Dei  nascitur.  Quare  non  mirum  si  effectus  per  synecdochen,  causam  cuius  signum  est,  sub  se  comprehendat.  Perperam  vero  faciet  si  quis  Dei  amorem  separet  ab  hominum  dilectione.  Diliges  proximum.  Nam  qui  diliget,  unicuique  ius  suum  reddet,  nemini  erit  iniurius  aut  nocebit,  benefaciet  quoad  poterit  omnibus.  Quid  autem  aliud  tota  secunda  tabula  agitur?  Atque  hanc  quoque  rationem  affert  Paulus  ad  Romanos.  Porro  sub  nomine  proximi  comprehenduntur  universi  mortales.  Iungit  enim  nos  communis  natura:  quemadmodum  admonet  Iesaias  (58,  7):  Carnem  tuam  ne  despexeris.  Praesertim  vero  imago  Dei  vinculum  coniunctionis  sacrosanctum  esse  debet.  Itaque  hic  amici  et  inimici  discrimen  non  est.  Neque  enim  hominum  improbitas  ius  naturae  delere  potest.  Particula  sicut  te  ipsum  hoc  valet:  quemadmodum  quisque  affectu  carnis  propensus  est  ad  se  amandum,  ita  nobis  commendari  a  Deo  amorem  erga  proximos.  Evertunt  enim,  non  interpretantur  verba  Domini,  qui  inde  colligunt  (ut  faciunt  omnes  Sorbonici)  amorem  nostri  semper  ordine  priorem  esse:  quia  regulatum  inferius  sit  sua  regula.  Asini  sunt,  qui  ne  micam  quidem  habent  caritatis.  Nam  si  amor  nostri  regula  esset,  sequeretur,  esse  rectum  et  sanctum  Deoque  approbari.  Atqui  nunquam  sincere  et  ex  sententia  Domini  proximos  diligendus,  donec  correxerimus  illum  nostri  amorem.  Sunt  enim  affectus  contrarii  et  pugnantes:  quum  amor