5:250  estis  templum  Dei,  sicut  dicit  (Levit.  26,  11):  Quoniam  inhabitabo  in  illis,  et  inter  eos  inambulabo,  et  ero  illorum  Deus,  et  erunt  mihi  populus.  Non  vult  usque  eo  Christianos  ab  omni  infidelium  necessitudine  abhorrere,  ut  nulli  inter  eos  intercedant  civiles  contractus,  nulla  commercia,  nulla  denique  colloquia.  Nam  alioqui,  ut  ipsemet  ait  (1  Cor.  5,  10),  exeundum  esset  ex  hoc  mundo:  sed  nullam  coire  societatem  permittit,  quae  horum  imitandis  superstitionibus  fideles  irretiat.  Post  Iesaiae  (Ies.  52,  11)  subnectit  testimonium:  Propter  quod  exite  de  medio  eorum,  et  separamini,  dicit1)  Dominus,  et  immundum  ne  tetigeritis.  Quo  non  ab  incredulorum  corporibus,  locorum  spatiis  procul  esse  dissitos,  sed  a  pollutis  eorum  sacris  longe  diremptos  esse  iubet.  Quod  vero  prophetae  verbis,  sive  de  suo,  sive  aliunde  attexuit  Paulus,  quod  tum  sit  recepturus  nos  Dominus,  et  patrem  nobis  praestaturus,  nosque  agniturus  in  filios  et  filias,  valde  percellere  nos  debet,  ne  si,  contra  quam  praecipit,  immundorum  attrectatione  non  prorsus  abstinuerimus,  abiici  ab  ipso  repudiarique  mereamur.  Proximi  offensionem  quum  alias  saepe,  tum  in  priore  ad  Corinthios  epistola  abunde  tractat,  ad  hunc  modum  (1  Cor.  8,  1  ss.):  De  epulis  quae  idolis  immolantur,  scimus  quod  idolum  nihil  est,  et  quod  nullus  est  nisi  unus  Deus:  nam  tametsi  multi  nominantur,  sive  in  coelo,  sive  in  terra,  dii,  nobis  tamen  unus  Deus  [pag.  15]  pater,  ex  quo  omnia,  et  nos  in  illo:  et  unus  Dominus  Iesus  Christus,  per  quem  omnia,  et  nos  per  ipsum:  sed  non  est  in  omnibus  scientia.  Hic  etiam  ab  anticipatione  exorditur,  qua  eos  qui  interioris  conscientiae  innocentiam  obtendendo  cavillantur,  talibus  subterfugiis  exclusos,  ad  hominum  opinionem  revocat:  quos  factorum  suorum  testes  dum  adhibent,  ad  eadem  audenda  exemplo  suo  invitant.  Audent  vero,  non  quia  licere  intelligant,  sed  quod  autorem  vident  quem  imitentur:  tametsi  ex  adverso  haesitante,  imo  reclamante  conscientiae  iudicio.  Ac  vide,  quam  severe  hac  una  exceptione  omnes  tergiversandi  ansas  circumcidat.  Idololatriae  speciem  quandam  et  simulationem  habebat  ille  ad  sacrum  idolorum  epulum  accubitus.  Accumbebant  nihilominus  ex  fidelibus  quidam,  hoc  praetextu,  quod  puras  et  sanctas  Dei  creaturas  ederent,  quae  etiam  si  millies  idolis  essent  consecratae,  contaminari  tamen  sacrilega  huiusmodi  consecratione  non  possent:  quandoquidem  nihil  sit  idolum,  nisi  vanum  indoctorum  figmentum.  Futilem  hunc  praetextum  quo  illis  tollat  apostolus,  illam  nimium  versutam  prudentiam,  qua  praeteritis  neglectisque  fratribus  sibi  duntaxat  saperent,  acerbe  castigat.  Scientia,  inquit,  inflat,  caritas  aedificat.  Si  quis  autem  existimat  se  scire  aliquid,  nondum  1)  Edd.  rece.  inde  a  1552:  dixit.