49:250  infligitur,  ac  si  dicere  voluisset,  in  eos  iure  animadverti  qui  in  potestatem  insurgunt:  sed  quamlibet  Dei  ultionem,  quovis  modo  tandem  exigatur.  Docet  enim  in  genere,  qualis  eos  finis  maneat,  qui  certamen  cum  Deo  suscipiunt.  3.  Principes  enim  non  sunt  terrori  bonis  operibus^  sed  malis.  Vis  ergo  non  timere  potestatem?  benefac,  et  habebis  laudem  ab  ea:  4.  Dei  enim  minister  est  tibi  in  bonum.  Si  vero  quid  mali  feceris,  time:  non  enim  frustra  gladium  gerit.  Dei  enim  minister  est  vindex  in  iram  adversus  eos  qui  male  agunt.  3.  Principes  enim.  Nunc  ab  utilitate  quoque  principum  observantiam  nobis  commendat.  Itaque  particula  rationalis  yap  ad  primam  propositiones  referenda  est,  non  ad  proximam  sententiam.  Haec  porro  est  utilitas,  quod  Dominus  hac  ratione  voluit  bonorum  tranquillitati  prospectum:  improborum  autem  coercitam  proterviam:  quibus  duabus  rebus  continetur  incolumitas  generis  humani.  Nisi  enim  malorum  furori  obviam  eatur,  et  ab  eorum  libidine  protegantur  innocentes,  omnia  protinus  pessum  ibunt.  Si  ergo  unicum  istud  remedium  est,  quo  ab  interitu  vindicetur  humanum  genus,  diligenter  a  nobis  conservari  debet,  nisi  velimus  nos  profiteri  publicos  humani  generis  hostes.  Quod  autem  addit:  vis  non  timere  potestatem?  benefac:  eo  innuit  nullam  esse  rationem  cur  a  magistratu  abhorreamus,  si  quidem  boni  simus:  imo  hanc  tacitam  esse  malae  conscientiae  et  pravum  aliquid  machinantis  testificationem,  si  quis  iugum  illud  excutere  a  se  aut  amoliri  velit.  Caeterum  hic  de  vero  et  quasi  nativo  magistratus  officio  loquitur:  a  quo  tametsi  non  raro  degenerant  qui  principatum  tenent  :  nihilominus  deserenda  illis  est  obedientia,  quae  principibus  debetur.  Nam  si  malus  princeps  flagellum  est  Domini  ad  punienda  populi  delicta,  illud  fieri  vitio  nostro  cogitemus,  quod  eximia  Dei  benedictio  nobis  vertatur  in  maledictionem.  Ideoque  non  desinamus  bonam  Dei  ordinationem  revereri:  quod  facile  factu  erit,  si  nobis  ipsis  quidquid  mali  in  ipsa  erit,  imputemus.  Ergo  hic  docet  in  quem  finem  instituti  sint  a  Domino  magistratus:  cuius  etiam  effectus  semper  exstaret,  nisi  culpa  nostra  corrumperetur  tam  praeclara  et  salubris  institutio.  Quamquam  ne  sic  quidem  unquam  abutuntur  sua  potestate  principes,  bonos  innocentesque  vexando,  ut  non  in  sua  tyrannide  speciem  aliquam  iustae  dominationis  retineant:  nulla  ergo  tyrannis  esse  potest,  quae  non  aliqua  ex  parte  subsidio  sit  ad  tuendam  hominum  societatem.  Hic  quoque  duas  partes  notavit,  quibus  etiam  philosophi  constare  senserunt  bene  ordinatam  reipublicae  administrationem,  bonorum  praemia  et  animadversionem  in  sceleratos.  Laudis  vocabulum  latam  significationem  hic  habet,  more  hebraico.  19