29:250  latis  haberi  volunt,  cuiusmodi  sunt,  genuum  inflexio,  manuum  aut  oculorum  in  coelos  elevatio,  et  similia  quae  ad  verum  finem  ferri  debent.  Nam  hypocritas  certum  est  plurimas  istiusmodi  caeremonias  et  gestus  adhibere  in  adorando  consuevisse,  multisque  eiulatibus  Deum  ad  se  quodammodo  pellicere  videri,  quasi  extra  se  positos,  quum  tamen  internis  odiis  ac  simultatibus  laborent,  ac  religionis  tantum  nomine  suam  hypocrisin  tegant.  Quare  diligenter  istud  observandum  est:  Deum  non  tantum  velle  se  invocari  aut  adorari,  sed  maxime  simplicitatem  et  integritatem  in  adoratione  requirere.  Fateor  equidem  non  paucos  Deum  bonorum  omnium  datorem  ac  largitorem  agnoscere,  ac  se  tanquam  peccatores  eius  iudicio,  gratiam  ac  misericordiam  per  Dominum  nostrum  Iesum  Christum  flagitantes,  sistere:  atque  se  illis  regendos  verbo  tradere,  summam  humilitatem  denique  prae  se  ferre:  verumtamen  ingratum  illum  Deo  cultum  esse  dico,  quod  verbis  et  externis  illis  ritibus  cor  minime  respondeat.  Talis  fuit  Peninnae  secundae  Elcanae  uxoris  religio.  Quare  nobis  in  hoc  laborandum  ne  ad  Deum  colendum  accedamus  cum  hypocrisi  et  simulatione:  atque  adeo  nobis  ecclesiam  ingredientibus,  Dei  verbum  audituris  et  preces  concepturis,  tria  haec  necessaria  cogitemus:  Primum,  agnoscendum  Deum  bonorum  omnium  unicum  auctorem,  ut  quaecunque  accepimus  bona  uni  illi  accepta  feramus,  ac  in  posterum  ab  eo  nos  regi  petamus,  ut  nunquam  nobis  ipsis  permittamur.  Alterum,  sic  agnoscenda  coram  eius  maiestate  peccata,  ut  si  conscientiae  morsibus  urgemur  magis  ac  magis  deiiciamur,  nostramque  penuriam,  egestatem,  miseriam  denique,  si  sua  misericordia  non  iuvet,  intuentes  veniam  deprecemur.  Denique  quod  a  natura  tanta  laboramus  diffidentia,  ut  potius  in  nos  iram  eius  quam  favorem  provocemus,  hanc  infirmitatem  corrigat,  suaque  virtute  sic  corroboret,  ut  eius  iugo  colla  subiicientes  et  ad  obedientiam  nos  componentes,  gratiam  ac  veniam  maiore  fiducia  nos  impetraturos  speremus.  Caeterum  solemnibus  precibus  etiam  sacrificia  hic  adiunguntur,  ut  Elcanam  populo  praescriptum  a  Deo  cultum  rite  et  diligenter  observasse  cognoscamus.  Porro  fateor  non  per  se  fuisse  illa  necessaria,  sed  Deus  illa  sublevandae  populi  ruditati  et  infirmitati  praescripserat.  Quare  oportuit  Elcanam  sacrificia  Deo  offerentem  in  id  quod  erat  in  sacrificiis  longe  praecipuum  intueri,  puta  veram  et  puram  sine  hypocrisi  adorationem.  Namque  Deus  ut  legem  suam,  et  populum  in  inito  foedere  magis  ac  magis  confirmaret,  sacrificia  precibus  coniunxerat,  ut  peccatorum  seriam  contritionem  gratuita  remissio  sequeretur,  quam  sacrificia  testificabantur.  Quare  ad  spiritualem  adorationem  necesse  fuit  etiam  confessionem  publicam  peccatorum  accedere.  Sic  hodie  nos  ad  Dei  cultum  et  timorem  incitari  sacra-