10.1:250  soit  nourry  des  biens  de  leglise.  Car  mesme  quand  il  y  auroit  bon  ordre  et  administration,  tel  cas  advenant,  ce  seroit  chose  decente  et  equitable  quune  partie  fust  appliquee  a  ceste  usaige:  pour  subvenir  a  ceux  qui  auroient  este  despouillez  de  leur  substance  ou  aultrement  auroient  este  appauvris  pour  le  tesmoignage  du  nom  de  Iesus  Christ.  Parquoy  ie  ne  trouve  nul  mal  quil  say  de  desdictes  possessions  pour  son  soulagement,  recognoissant  que  Dieu  luy  a  assiste  par  ce  moyen  apres  lavoir  esprouve  en  la  perte  de  ce  qui  luy  avoit  donne  auparavant.  Il  est  vray  que  la  forme  de  donation  nest  pas  fort  bien  fondee  selon  la  teneur  de  linstrument.  Mais  marrestant  plustost  a  lequite  qu'a  la  formalite  de  droict  (comme  aussi  la  raison  le  veult)  et  mesme  attendu  que  la  princesse  estant  au  pais  de  france  neust  ose  autrement  faire:  puis  quil  ny  a  nul  vice  en  la  substance  ie  ne  doubte  pas  quil  n'en  puisse  user  en  bonne  conscience  selon  Dieu.  Car  come  iay  dict  ce  bien  la  est  iustement  applique  a  la  nourriture  et  subvention  de  ceux  qui  aultrement  auroient  faulte,  pour  avoir  souffert  dommaige  a  cause  de  levangile.  Quant  a  la  succession  perpetuelle  de  ses  heritiers  il  j  auroit  plus  de  difficulte.  Car  tout  ainsi  quil  est  licite  de  subvenir  a  la  necessite  presente  dun  qui  aura  este  endommage  comme  luy,  aussi  de  faire  une  alienation  perpetuelle  en  faveur  de  sa  maison  cest  chose  de  consequence  perilleuse  et  dont  lexemple  n'est  pas  bon  ny  a  prouver.  Trop  bien  que  les  enfans  feussent  advancez  de  quelque  liberalite  pour  estre  mis  en  train  affin  de  servir  a  Dieu.  Et  quen  cela  mesme  leglise  suppliat  au  deffault  du  pere.  Parquoy  ie  ne  vouldrois  pas  condamner  une  telle  gratuite:  mais  plustost  la  tiens  louable  moiennant  que  lalienation  des  biens  et  possessions  ne  se  fist  pas  pour  en  frustrer  les  paovres  a  iammais  pour  le  temps  a  venir.  Et  de  faict  cest  une  grant  faulte  et  pernicieuse  auiourdhuy  en  plusieurs  lieux  ou  se  presche  levangile  que  les  biens  ecclesiastiques  sont  dissipez  ou  lusaige  en  est  profane,  sans  avoir  esgard  a  quelle  fin  ils  sont  desdiez.  Et  combien  quon  nen  face  pas  grant  compte  si  est  ce  un  abus  que  Dieu  reformera  en  brief  rigoreusement  si  les  homes  ne  sen  corrigent.  Ie  scay  quelle  est  lexcuse  commune:  que  ces  biens  ont  esse  donnez  aux  moines  et  prestres  par  superstition  pour  fonder  messes  et  obitz,  pour  idolatrer,  se  nourrir  en  oisifvete  etc.  Parquoy  que  tout  cela  doit  estre  aboly:  ou  bien  que  les  princes  les  peuvent  approprer  a  leur  domene  comme  anciennement  les  heritages  quon  appeloit  caducques.  Mais  tout  cela  na  point  lieu  devant  Dieu.  Car  nous  sommes  enseignez  par  la  parole  de  Dieu  quel  est  le  droict  usaige  des  biens  qui  sont  desdiez  a  son  honneur.  Et  en  leglise  ancienne  il  y  a  eu  sainctes