47:25  25  CAPUT  I.  29.  Postridie  videt  Ioannes  Iesum  venientem  ad  se,  et  dicit:  Ecce  agnus  Dei  qui  tollit  peccatum  mundi.  30.  Hic  est  de  quo  dixi:  Post  me  venit  vir  qui  mihi  praepositus  est,  quia  excellentior  me  erat  31.  Et  ego  non  noveram  eum:  sed  ut  manifestaretur  Israeli,  propterea  ego  veni  aqua  baptizans.  32.  Et  testificatus  est  Ioannes  dicens:  Ego  conspexi  spiritum  descendentem  instar  columbae  de  coelo,  et  mansit  super  eum.  33.  Et  ego  non  noveram  eum:  sed  qui  me  misit  ad  baptizandum  aqua,  ille  mihi  dixit:  Super  quem  videris  spiritum  descendentem,  et  manentem  super  eum,  hic  est,  qui  baptizat  in  spiritu  sancto.  34.  Ego  itaque  vidi,  et  testificatus  sum,  quod  hic  est  filius  Dei.  29.  Postridie.  Non  dubium  est  quin  iam  prius  de  Messiae  exhibitione  verba  fecisset  Ioannes:  sed  quum  exortus  est  Christus,  voluit  brevi  tempore  innotescere  illius  praeconium,  et  iam  instabat  tempus  quo  Christus  finem  illius  ministerio  afferret,  quemadmodum  sole  exorto  aurora  subito  evanescit.  Ergo  quum  sacerdotibus  legatis  testatus  esset  adesse  iam  et  versari  in  medio  populi,  a  quo  baptismi  veritas  et  virtus  petenda  esset,  postridie  eum  palam  ostendit.  Haec  enim  duo  continua  temporis  serie  coniuncta  plus  ad  movendos  animos  valent.  Haec  eadem  ratio  est  cur  Christus  se  in  eius  conspectum  offerat.  Ecce  agnus  Dei.  Praecipuum  Christi  officium  breviter  quidem,  sed  dilucide  exponit,  quod  scilicet  peccata  mundi  mortis  suae  sacrificio  tollens  homines  Deo  reconciliet.  Alia  quidem  beneficia  nobis  confert  Christus,  sed  hoc  summum,  et  ex  quo  reliqua  dependent:  quod  iram  Dei  placando  facit  ut  iusti  et  puri  censeamur.  Ex  hoc  enim  fonte  profluunt  omnes  bonorum  rivi,  quod  Deus  peccata  non  imputando  in  gratiam  nos  recipit.  Ideo  Ioannes  ut  nos  ad  Christum  adducat  a  gratuita,  quam  per  ipsum  consequimur,  peccatorum  venia  exordium  facit.  Porro  in  voce  Agni  ad  vetera  legis  sacrificia  alludit.  Erat  illi  cum  Iudaeis  negotium,  qui  sacrificiis  assueti,  aliter  de  peccatorum  expiatione  doceri  non  poterant,  quam  proposito  in  medium  sacrificio.  Quum  autem  variae  fuerint  species,  una  hic  per  synecdochen  ponitur.  Et  probabile  est  Ioannem  ad  agnum  paschalem  respexisse.  In  summa  notandum  est  Ioannem  hac  loquutione  usum  esse,  quae  ad  docendos  Iudaeos  aptior  erat,  et  plus  habebat  energiae:  quemadmodum  nos  hodie  propter  baptismi  usum  melius  apprehendimus  quid  valeat  peccatorum  remissio  sanguine  Christi  parta,  quum  audimus  nos  illo  ablui  et  purgari  sordibus  nostris.  Interea  quum  superstitiose  de  sacrificiis  vulgo  Iudaei  sentirent,  vitium  illud  obiter  corrigit,  quorsum  spectarint  illa  omnia  admonens.  Hic  pessimus  erat  sacrificandi  abusus,  quod  in  symbolis  defixam  habebant  fidu-