41:25  25  IN  DANIELEM.  CAP.  VI.  26  esse  discrimen  inter  aeternam  salutem  et  speciales  liberationes.  Deus  nos  liberat  a  morte  aeterna,  et  ad  spem  vitae  aeternae  adoptat,  non  quia  inveniat  quidquam  iustitiae  in  nobis,  sed  quoniam  gratuito  nos  elegit:  ideo  perficit  in  nobis  opus  suum  absque  ullo  operum  respectu.  Quantum  ergo  ad  salutem  aeternam  spectat,  nullus  potest  esse  respectus  iustitiae:  quia  ubi  nos  excutiet  Deus,  nihil  inveniet  praeter  damnationis  materiam.  Sed  quantum  ad  particulares  liberationes  spectat,  illic  Deus  potest  respicere  cuiusque  iustitiam  :  non  quod  nobis  propria  sit:  sed  quos  gubernat  suo  spiritu,  ut  vocationi  eius  obtemperent,  illis  etiam  manum  porrigit:  et  si  periclitentur  ob  id  quod  studuerint  illi  obsequia  sua  offerre,  liberat  eos.  Perinde  est  hoc,  ac  si  quis  diceret  Deum  favere  bonis  causis.  Hoc  autem  nihil  ad  merita.  Ergo  quantum  ad  hunc  locum  spectat,  nimis  pueriliter  ineptiunt  papistae,  qui  inde  merita  eliciunt:  quoniam  Daniel  nihil  aliud  voluit,  quam  asserere  purum  unius  Dei  cultum:  quasi  diceret,  non  modo  sui  rationem  habitam  fuisse  a  Deo,  sed  fuisse  aliam  causam  suae  liberationis,  quia  scilicet  re  ipsa,  et  experimento  Deus  ostendere  voluerit  fuisse  iustam  eius  causam.  Adiungit,  Atque  etiam  coram  te1  rex,  nullam  pravitatem  commisi.  Certum  est  violatum  fuisse  regis  edictum  a  propheta.  Cur  ergo  non  hoc  ingenue  fatetur?  Imo  cur  contendit  se  nihil  peccasse  contra  regem?  Nempe  quia  fideliter  se  gesserat  in  omnibus  iustis  officiis,  potuit  se  eximere  a  calumnia,  qua  sciebat  se  gravari,  quod  scilicet  sprevisset  regis  imperium.  Neque  enim  Daniel  ita  obstrictus  fuit  regi  Persarum  quin  Deus  sibi  vindicaret  quod  non  potest  ei  auferri.  Scimus  constitui  terrena  imperia  a  Deo,  sed  hac  lege,  ut  ipse  nihil  sibi  deroget,  sed  emineat  solus,  atque  in  ordinem  cogantur  omnes  magistratus,  et  quidquid  est  praestantiae  in  mundo,  eius  gloriae  sit  subiectum.  Quoniam  ergo  non  poterat  Daniel  parere  regis  edicto  quin  Deum  abnegaret,  quemadmodum  antea  visum  est,  non  deliquit  contra  regem,  ubi  constanter  perrexit  in  illo  exercitio  pietatis,  cui  assueverat,  ut  scilicet  ter  quotidie  Deum  rogaret.  Et  quo  hoc  melius  pateat,  tenenda  est  illa  sententia  Petri  (1.  Ep.  2,  17),  Deum  timete,  regem  honorate.  Sunt  haec  duo  inter  se  connexa,  nec  potest  alterum  ab  altero  divelli.  Praecedat  igitur  oportet  timor  Dei,  ut  reges  obtineant  suam  autoritatem.  Nam  si  quis  incipiat  a  reverentia  terreni  principis  Deo  praeterito,  ille  praepostere  faciet:  quando  hoc  esset  pervertere  totum  naturae  ordinem.  Ergo  priore  loco  timeatur  Deus,  obtineant  principes  terreni  suam  autoritatem,  sic  tamen  ut  Deus  emineat,  quemadmodum  iam  dixi.  Iure  ergo  Daniel  hic  se  defendit,  quod  nullam  pravitatem  commiserit  adversus  regem,  quia  scilicet  coactus  parere  Dei  imperio  neglexerit  quod  in  contrariam  partem  rex  mandabat.  Abdicant  enim