31:25  25  26  statueram,  ut  non  longior  quam  unius  noctis  mora  in  urbe  mihi  foret.  Paulo  ante  huius  optimi  viri  et  Petri  Vireti  opera  profligatus  erat  papatus;  sed  res  adhuc  incompositae  et  urbs  in  pravas  et  noxias  factiones  divisa.  Unus  homo,  qui  nunc  turpi  defectione  iterum  ad  papistas  rediit,  statim  fecit  ut  innotescerem.  Hic  Farellus  (ut  incredibili  zelo  promovendi  evangelii  flagrabat)  statim  ad  me  retinendum  obnixe  nervos  omnes  intendit.  Et  quum  privatis  et  occultis  studiis  me  intelligeret  esse  deditum,  ubi  se  vidit  rogando  nihil  proficere,  usque  ad  exsercrationem  descendit,  ut  Deus  otio  meo  malediceret,  si  me  a  ferendis  subsidiis  in  tanta  necessitate  subducerem.  Quo  terrore  perculsus  susceptum  iter  ita  omisi,  ut  mihi  et  verecundiae  et  timiditatis  meae  conscius  obeundo  certo  muneri  fidem  meam  non  obstringerem.  Vix  quatuor  menses  praeterierant,  quum  nos  ab  una  parte  aggressi  sunt  Anabaptistae,  ab  altera  sceleratus  quidam  apostata,  qui  clandestinis  quorundam  procerum  opibus  fretus  multum  negotii  facessere  nobis  poterat.  Interea  seditiones  domesticae,  et  quidem  aliae  super  alias,  mirifice  nos  iactarunt.  Ego,  qui  natura  timido,  molli  et  pusillo  animo  me  esse  fateor,  inter  prima  rudimenta  hos  tam  impetuosos  fluctus  excipere  coactus  sum  :  quibus  etsi  non  succubui,  me  tamen  non  tanta  sustinuit  magnanimitas,  quin  turbulenta  eiectione  plus  quam  decebat  laetatus  sim.  Atque  hoc  vocationis  vinculo  solutus  et  liber  statueram  privatus  quiescere,  dum  prae  stantissimus  Christi  minister  Martinus  Bucerus  me  iterum  simili  qua  usus  fuerat  Farellus  obsecratione  ad  novam  stationem  retraxit.  Ionae  itaque  exemplo  quod  proposuerat  territus  in  docendi  munere  perrexi.  Atque  etiam,  quum  semper  essem  mei  similis,  celebritatem  fugitans,  nescio  quo  modo  ad  imperiales  conventus  raptus  sum,  ubi,  vellem  nollem,  necesse  mihi  fuit  in  conspectum  multorum  prodire.  Postea  quum