41:249  249  IN  DANIELEM.  CAP.  XI.  250  hic  singularis  confirmatio  suppetit,  quoniam  nulla  est  ratio,  cur  dubitent  fideles  Deum  loquutum  esse,  ubi  de  rebus  futuris  sic  concionatus  est  angelus,  hoc  est,  tam  aperte  ac  si  narraret  rem  gestam.  Postea  adiungit  prospere  non  cessurum,  quoniam  adhuc  finis  ad  tempus,  inquit.  Revocat  angelus  fideles  ad  providentiam  Dei.  Nam  semper  subsidunt  mentes  nostrae  in  mediis  terrenis.  Quantum  enim  oculis  cernimus,  tantum  fere  percipimus  animo.  Occurrunt  autem  semper  nobis  causae,  cur  hoc  ita  contigerit,  cur  non  habuerit  successum  haec  vel  illa  actio:  interea  Deus  omittitur.  Ergo  ut  huic  vitio,  hoc  est,  ut  stupori  hominum  angelus  occurrat,  dicit  non  prospere  cessurum  quidquid  inter  se  agitabunt  reges,  quoniam  finis  ad  tempus,  hoc  est,  quoniam  Deus  tenet  multas  res  suspensas.  Videmus  ergo  sic  considerandas  nobis  esse  causas  inferiores,  ut  interea  penes  Deum  resideat  summa  potestas,  atque  ut  ipse  moderetur  suo  arbitrio  quidquid  inter  se  versant  homines.  Haec  autem  non  parum  utilis  fuit  doctrina  fidelibus,  quum  scirent  reges  quidem  multa  hinc  inde  moliri,  et  non  destitui  astutia,  et  plurimis  artibus  perversis,  Deum  tamen  tenere  tam  ipsorum  animos,  quam  rerum  eventus  arcano  fraeno,  ut  nihil  posset  accidere,  nisi  ex  decreto  coelesti.  Etsi  autem  colligere  licet  ex  hoc  loco  generalem  doctrinam,  non  dubium  tamen  quin  angelus  ad  praesentem  historiam  restringat  quod  dixi,  nempe  nondum  adesse  finem,  sed  opportunum  tempus  occulto  Dei  consilio  esse  praefixum,  quo  nunc  vincat  Antiochus,  nunc  autem  recedat,  quemadmodum  videbimus.  Sequitur,  28.  Et  revertetur  in  terram  suam  cum  opibus  magnis,  et  cor  eius  ad  foedus  sanctitatis,  et  faciet,  et  revertetur  in  terram  suam.  Hic  angelus  praedicit  pacem  illam  fore  calamitosam  populo  Dei,  quoniam  Antiochus  convertet  suum  impetum  contra  Ierosolymam  et  totam  gentem.  Dicit  enim  principio  versus,  Revertetur  in  terram  suam,  nempe  quia  non  potietur  Aegypto.  Reditus  ergo  hic  significat  Antiochum  ita  fore  victorem,  ut  tamen  sese  recipiat  intra  antiquos  fines  suae  ditionis.  Quum  autem  adiungit,  cum  supellectile  magna,  vel  cum  magnis  opibus,  simul  exprimit  unde  colliget  opes  illas,  nempe  quia  cor  eius  erit  contra  foedus  sanctum.  Diripuit  enim  Ierosolymam  et  templum  Dei  aliqua  ex  parte.  Coactus  quidem  fuit  vel  pudore,  vel  reverentia  vel  etiam  miraculo,  ut  dicitur  in  libro  Machabaeorum  (2.  Macc.  5,  2),  relinquere  templum,  et  multos  thesauros.  Libenter  enim  exinaniisset  totum  templum,  sed  Deus  illum  tunc  compescuit.  Collegit  tamen  sibi  magnas  opes.  Et  ideo  angelus  utrumque  coniungit,  nempe  rediturum  esse  in  Syriam  cum  magnis  opibus,  et  cor