50:248  vultis  ratam  esse  Dei  vocationem,  cavete  ne  istis  aurem  praebeatis,  qui  nova  commenta  vobis  ingerunt.  Etsi  autem  graeci  participii  tempus  fateor  esse  praesens:  quia  tamen  indefinite  accipitur,  vertere  placuit  pui  vos  vocavit,  tollendae  amphiboliae  causa.  9.  Modicum  fermentum.  Ego  ad  doctrinam  refero,  non  ad  homines.  Admonet  enim  quam  perniciosa  res  sit  doctrinae  corruptio:  ne  quasi  rem  nullius  aut  non  magni  periculi  (ut  fieri  solet)  negligant.  Nam  hoc  cuniculo  Satan  obrepit,  quod  non  palam  labefactat  totam  doctrinam,  sed  eius  puritatem  inficit  falsis  et  adulterinis  opinionibus.  Multi  quia  mali  gravitatem  non  animadvertunt,  minus  vehementes  sunt  in  resistendo.  Ergo  hic  apostolus  reclamat,  nihil  iam  manere  salvi  postquam  vitiata  est  Dei  veritas.  Ac  similitudine  fermenti  utitur,  quod,  etiamsi  exiguum  sit,  acorem  suum  transfundit  in  totam  massam.  Sollicite  ergo  cavendum  ne  quid  purae  evangelii  doctrinae  affingi  sinamus.  10.  Ego  persuasus  sum.  Rursus  totam  asperitatem  derivat  in  pseudoapostolos:  illos  causam  mali  esse  dicit,  illis  poenam  minatur:  de  Galatis  se  bene  sperare  commemorat,  quod  cito  et  facile  redituri  sint  in  verum  consensum.  Illud  enim  nobis  animum  addit,  quum  audimus  bene  de  nobis  sperari.  Nam  turpe  ducimus,  eorum  fallere  opinionem  qui  candide  et  amice  de  nobis  sentiunt.  Quia  autem  Dei  opus  erat,  Galatas  reducere  in  puram  fidei  doctrinam  a  qua  deflexerant,  dicit  se  in  Domino  sperare:  quo  admonet,  coeleste  donum  esse  resipiscentiam,  ut  ipsi  quoque  idem  a  Deo  postulent.  Qui  autem  turbat  vos.  Confirmatio  est  proximae  sententiae,  quia  oblique  magnam  culpae  partem  transscribit  in  illos  impostores,  a  quibus  delusi  fuerant  Galatae.  Quam  enim  vindictam  illis  denuntiat,  ab  ea  Galatas  fere  eximit.  Caeterum  audiant  quicunque  occasionem  turbarum  praebent  ecclesiis,  qui  fidei  unitatem  solvunt,  qui  concordiam  labefactant  :  et  si  quid  habent  recti  sensus,  expavescant  ad  hanc  vocem.  Pronuntiat  enim  Deus  per  os  Pauli,  nullos  talium  scandalorum  autores  inultos  fore.  Particula  quisquis  sit  emphasin  habet.  Nam  quia  sua  magniloquentia  rude  vulgus  territabant  pseudoapostoli,  oportuit  Paulum  ex  adverso  ita  magnifice  efferre  suam  doctrinam,  ut  nemini  parceret  qui  auderet  contra  hiscere,  quocunque  alioqui  titulo  esset  insignis.  11.  Ego  autem,  fratres.  Argumentum  a  causa  finali.  Liceret,  inquit,  mihi  vitare  odia  hominum,  pericula,  persequutiones:  si  tantum  caeremonias  vellem  Christo  miscere.  Quod  igitur  de  hac  re  tantopere  pugno  in  contrarium,  non  facio  mea  causa,  nec  meo  commodo.  Sed  an  propterea  sequitur  verum  esse  quod  docet?  Respondeo,  rectum  affectum  et  puram  conscientiam  doctoris  non  parum  valere  ad  faciendam  fidem.  Deinde  non  est  credibile,  tam