47:248  appendix.  Nec  porticum  veterem  intelligit  a  Salomone  olim  exstructam,  quae  a  Chaldaeis  prorsus  ^diruta  fuerat,  sed  quam  Iudaei,  forte  primum  ab  exsilio  babylonico  reversi,  ad  exemplar  veteris  illius  conditam,  nomine  etiam  ornaverant,  ut  plus  haberet  dignitatis:  deinde  Herodes  novi  templi  conditor.  24.  Circumdederunt  ergo  eum  Iudaei.  Non  dubium  est  quin  astute  Christum  aggressi  fuerint,  saltem  qui  primi  erant  huius  consilii  autores.  Nam  vulgus  promiscuum  potuit  sine  fraude  expetere,  ut  Iesus  palam  manifestaret  se  missum  esse  a  Deo  liberatorem,  sed  pauci  captiose  et  per  insidias  vocem  hanc  in  turba  elicere  volebant,  ut  per  tumultum  e  medio  tolleretur,  vel  Romani  in  eum  manus  iniicerent.  Quod  se  queruntur  teneri  suspensos,  eo  prae  se  ferunt,  se  redemptionis  promissae  tam  ardenter  esse  cupidos,  ut  Christi  desiderium  assidue  eorum  animos  sollicitet.  Atque  hic  verus  est  pietatis  affectus,  nusquam  alibi  invenire  quam  in  solo  Christo,  quod  mentibus  nostris  satisfaciat  easque  vere  tranquillet:  quaemadmodum  et  ipse  loquitur:  Venite  ad  me  omnes  qui  anxii  estis  et  onerati:  et  ego  reficiam  vos,  et  quietem  invenient  animae  vestrae.  Ergo  qui  ad  Christum  veniunt  sic  comparatos  esse  decet,  ut  se  isti  fingunt  esse.  Sed  immerito  Christum  accusant,  quasi  hactenus  non  stabilierit  ipsorum  fidem:  nam  per  eos  tantum  steterat,  quo  minus  plenam  et  solidam  haberent  eius  notitiam.  Sed  hoc  incredulis  perpetuum  est,  fluctuari  dubios  malle  quam  fundari  in  certo  Dei  verbo.  Ita  hodie  plurimos  videmus,  quum  ultro  oculos  claudant,  spargere  suae  dubitationis  nebulas,  quibus  obscurent  claram  evangelii  lucem.  Multos  etiam  videmus  leves  spiritus,  qui  per  frivolas  speculationes  volitando  fixam  stationem  tota  vita  non  reperiunt.  Quum  postulant  ut  Christus  palam  vel  libere  et  cum  fiducia  se  manifestet,  sensus  eorum  est,  ne  oblique  amplius  et  quasi  per  ambages  se  insinuet.  Ita  obscuritatis  insimulant  eius  doctrinam,  quae  tamen  satis  aperta  et  sonora  fuerat,  nisi  in  homines  surdos  incidisset.  Admonet  autem  haec  historia,  non  posse  nos  malorum  insidias  et  calumnias  effugere,  si  ad  praedicandum  evangelium  vocati  sumus.  Quare  in  excubiis  stare  oportet,  nec  quasi  re  nova  percelli,  quum  idem  nobis  quod  magistro  accidet.  25.  Dixi  vobis.  Non  dissimulat  dominus  se  esse  Christum,  neque  tamen  docet  eos,  quasi  sint  ad  discendum  idonei,  quin  potius  malitiam  in  qua  obstinati  erant  illis  exprobrat,  quia  nihil  hactenus  profecerant  verbo  et  operibus  Dei  edocti.  Quod  ergo  non  cognoscitur  ab  illis,  id  eorum  vitio  imputat,  ac  si  diceret:  Doctrina  mea  satis  per  se  ad  intelligendum  facilis  est,  culpa  autem  in  vobis  haeret,  quia  Deo  maligne  resistitis.  Postea  de  operibus  loquitur,  ut  duplicis  contumaciae  ipsos  convincat.  Nam  praeter  doctrinam  luculentum  habebant  in  mi-