1:248  [CO  1.  248]  De  privatis  hominibus  semper  loquor.  Nam  si  qui  nunc  sint  populares  magistratus,  ad  moderandam  regum  libidinem  constituti,  quales  olim  erant  qui  lacedaemoniis  regibus  oppositi  erant  Ephori,  aut  romanis  consulibus  tribuni  plebis,  aut  Atheniensium  senatui  Demarchi,  et  qua  etiam  forte  potestate,  ut  nunc  res  habent,  funguntur  in  singulis  regnis  tres  ordines,  cum  primarios  conventus  peragunt,  adeo  illos  ferocienti  regum  licentiae,  pro  officio  intercedere  non  veto,  ut  si  regibus  impotenter  grassantibus  et  humili  plebeculae [p. 513]  insultantibus  conniveant,  eorum  dissimulationem  nefaria  perfidia  non  carere  affirmem,  qua  populi  libertatem,  cuius  se  Dei  ordinatione  tutores  positos  norunt,  fraudulenter  produnt.  At  vero  in  ea,  quam  praefectorum  imperiis  deberi  constituimus  obedientia,  id  semper  excipiendum  est,  imo  in  primis  observandum,  ne  ab  eius  obedientia  nos  deducat,  cuius  voluntati  regum  omnium  vota  subesse,  cuius  decretis  iussa  cedere,  cuius  maiestati  fasces  submitti  par  est.  Et  vero  ut  hominibus  satisfacias,  in  eius  offensionem  incurrere,  propter  quem  hominibus  ipsis  obedias,  quam  praeposterum  fuerit?  Dominus  ergo  rex  est  regum,  qui  ubi  sacrum  os  aperuit,  unus  pro  omnibus  simul  ac  supra  omnes  sit  audiendus.  Iis  deinde  qui  nobis  praesunt,  hominibus  subiecti  sumus:  sed  non  nisi  in  ipso.  Adversus  ipsum  si  quid  imperent,  nullo  sit  nec  loco,  nec  numero.  Neque  hic  totam  illam,  qua  magistratus  [OS  280]  pollent,  dignitatem  quidquam  moremur;  cui  iniuria  nulla  fit,  dum  in  ordinem,  prae  singulari  illa  vereque  summa  Dei  potestate,  cogitur.  Scio  quantum  quamque  praesens  huic  constantiae  periculum  immineat,  quod  indignissime  se  contemni  reges  ferant,  quorum  indignatio  nuncius  est  mortis,  inquit  Solomon  (Prov.  16).  Sed  cum  istud  a  coelesti  praecone [p. 514]  Petro  pronunciatum  sit  edictum  (Act.  4):  Obediendum  Deo  potius  quam  hominibus,  hac  nos  cogitatione  consolemur.  Illam  tum  nos  praestare  quam  Dominus  exigit  obedientiam,  dum  quidvis  perpetimur  potius  quam  a  pietate  deflectamus.  Et  ne  nobis  labascant  animi,  alium  etiam  stimulum  Paulus  admovet  (1  Cor.  7):  Nos  ideo  tanti  a  Christo  redemptos  esse,  quanti  illi  constitit  nostra  redemptio,  ne  pravis  hominum  cupiditatibus  servos  nos  addicamus,  multo  vero  minus  impietati.  FINIS.