6:247  RESPONSIO  CONTRA  PIGHIUM  omnia  laudant  ac  mirantur,  quae  nos  quovis  modo  impugnant.  Fruatur  ergo  sane  sua  ista  in  tenebris  iactantia.  Sed  exstabit,  ut  spero,  in  luce  et  oculis  bonorum  mea  Institutio,  tantae  eius  impudentiae  testis  ac  vindex.  Neque  tamen  Irae  de  re  verbum  facturus  eram,  nisi  me  eius  improbitas  coegisset.  Sed  quum  toties  nos,  tanquam  indoctos,  nullius  ingenii,  nullius  iudicii,  ex  alto  superbiae  suae  fastigio  despiciat,  operae  pretium  fuit,  palam  fieri,  nec  ingenuum  hominem,  nec  gratum  esse,  qui  tam  crudeliter  eos  laceraret,  quorum  tamen  magisterio  nonnihil  adiutus  foret.  [pag.  20]  Quae  autem  postea  de  suo  admisceat,  ut  deformet,  aut  pervertat  bene  dicta,  non  est  huius  operis  excutere.  Summa  tamen  huc  redit,  in  illa  Dei  et  nostri  notitia,  dum  mutuo  inter  se  comparantur,  nos  iustum  Dei  iudicium  non  posse  intelligere,  quin  libero  nos  voluntatis  arbitrio  praeditos  sciamus,  et  in  nobis  positum,  ut  obediamus  praeceptis:  declinare  a  malo,  facere  bonum,  et  contra.  Ubi  hoc  constituit,  mox  ad  sententiae  nostrae  explicationem  aggreditur.  Atque  id  quidem  primum  ex  Lutheri  verbis,  quae  censebat  minus  accommodata  esse  ad  popularem  captum:  deinde  ex  meis,  quibus  etiam  per  totum  opus  insistit:  ut  in  meo  capite  totam,  ut  ipse  vocat,  sectam  nostram  oppugnet.  Haec  est  clausula  primi  libri.  Porro,  quoniam  hac  potissimum  machina  evertere  doctrinam  nostram  conatur,  quod  a  communis  sensu  maxime  abhorreat,  praefatur,  non  immerito  Lutherum  hoc  rudimento  suos  imbuere,  ut  carnis  rationi  ac  sapientiae  renunciare  discant:  quia  tantum  absurditatis  habeant  pleraque  eius  dogmata,  et  prae  aliis  hoc  quod  tractamus,  de  servo  hominis  arbitrio,  ut  quibus  persuadere  velis,  eruere  iis  oculos  mentis,  et  omnem  rationis  sensum  adimere  oporteat.  Illam  vero  sententiam,  quae  inter  christiani  nominis  homines  nihilo  plus  controversiae  habere  debuerat,  quam  unum  esse  Deum,  quibus  probis  lacerat?  imo  quam  ridiculis  cavillis  exagitat?  Pugnat,  inquit,  cum  apostolo,  qui  fidem  testatur  esse  ex  auditu  praedicationis.  Deinde,  si  vera  foret,  infantes  et  moriones  ad  fidem  percipiendam  sequetur  reliquis  omnibus  esse  magis  idoneos.  Quasi  vero  non  continuo  post  hunc  Pighii  nodum  solvat  Paulus,  quum  ex  arcana  Dei  revelatione  pendere  fidem  subiungit:  aut  quasi  hominem  stipitem  faciat,  qui  ratione  carnis  eum  spoliat,  hoc  est  inani  sapientiae  persuasione.  Verum,  ut  intelligat,  non  nobiscum  sibi  esse  certamen,  sed  cum  ipso  Paulo,  audiat  eius  verba,  si  aures  habet.  Animalis,  inquit,  homo  [pag.  21]  non  accipit  ea  quae  sunt  spiritus  Dei:  stultitia  illi  sunt,  nec  potest  cognoscere  quod  spiritualiter  diiudicantur  (1  Cor.  2,  14).  Reddat  ipse  quoque  nobis  rationem,  cur  ita  sit.  Nempe,  quia  infatuavit  Deus  sapientiam  huius  mundi,