47:247  247  IN  EVANGELIUM  IOANNIS  248  quia  inultos  etiam  adversarios  eius  doctrina  habet,  inde  exoritur  dissidium  ut  scindantur  inter  se,  qui  prius  erant  quasi  unum  ecclesiae  corpus:  nam  uno  consensu  omnes  profitebantur,  se  colere  Deum  Abrahae  et  Mosis  legem  sequi.  Nunc  ubi  Christus  emergit,  dissidere  eius  causa  incipiunt.  Si  vera  fuisset  illa  professio,  Christus,  qui  summum  est  vinculum  caritatis  et  cuius  officium  est  quae  dissipata  sunt  colligere,  consensum  eorum  minime  abrumperet.  Sed  evangelii  sui  luce  multorum  hypocrisin  detegit,  qui  falso  tantum  praetextu  fucati  se  populum  Dei  esse  iactabant.  Ita  etiam  nunc  iacit  multorum  pravitas,  ut  dissidiis  turbetur  ecclesia  et  contentiones  ferveant:  interim  qui  conturbant  pacem,  culpam  in  nos  reiiciunt  ac  schismaticos  vocant:  hoc  enim  praecipuo  crimine  gravamur  a  papistis,  quod  tranquillum  ecclesiae  statum  concusserit  nostra  doctrina.  Atqui  si  Christo  placide  se  ipsi  submitterent,  ac  manum  darent  veritati,  statim  sedati  essent  omnes  motus.  Sed  quum  ipsi  fremant  ac  tumultuentur  adversus  Christum,  nec  alia  lege  quiescere  nobis  permittant,  nisi  ut  exstincta  iaceat  Dei  veritas  et  Christus  a  regno  suo  exsulet,  iniuste  nobis  obiiciunt  schismatis  crimen:  quod  ipsis  imputandum  esse  nemo  non  cernit.  Dolendum  sane  est  intestinis  discordiis  lacerari  ecclesiam,  sed  praestat  esse  aliquos  qui  se  ab  impiis  disiungant,  ut  Christo  capiti  suo  uniantur,  quam  omnes  in  contemptum  Dei  esse  concordes.  Itaque  semper  in  schismatibus  videndum,  quinam  a  Deo  et  pura  eius  doctrina  discessionem  faciunt.  20.  21.  Daemonium  habet.  Quam  possunt  odiosissimo  probro  infamant  Christum,  ut  eum  audire  omnes  horreant.  Nam  impii  ne  cedere  Deo  cogantur  furiose  et  clausis  oculis  in  superbum  eius  contemptum  prorumpunt  et  alios  incitant  ad  eandem  rabiem,  ne  qua  vox  Christi  cum  silentio  audiatur:  atqui  ipsa  Christi  doctrina  satis  in  se  defensionis  habet  adversus  calumnias.  Atque  hoc  suo  responso  intelligunt  fideles,  quum  haec  verba  negant  esse  daemoniaci.  Perinde  enim  est  ac  si  iudicium  ex  re  ipsa  fieri  poscerent.  Veritas  enim,  ut  dictum  est,  se  ipsam  satis  asserit.  Atque  hoc  est  unicum  fidei  nostrae  praesidium,  quod  nunquam  efficere  poterunt  impii,  quin  Dei  virtus  et  sapientia  in  evangelio  refulgeat.  22.  Facta  sunt  encaenia.  Acsi  diceres,  innovationes:  quia  templum,  quod  pollutum  fuerat,  de  integro  consecratum  fuit  auspiciis  Iudae  Maccabaei,  ac  tunc  institutum  fuit  ut  quotannis  festus  ac  celebris  esset  dedicationis  novae  dies,  ut  Dei  gratiam,  quae  finem  Antiochi  tyrannidi  imposuerat,  memoria  repeterent.  Tunc  autem  in  templo  Christus  pro  more  apparuit,  ut  in  frequenti  hominum  conventu  uberior  esset  praedicationis  suae  fructus.  23.  Porticum  Salomonis  templum  vocat  evangelista  :  non  quod  sanctuarium  esset,  sed  templi  solum