1:247  [CO  1.  247]  regum  corda,  et  regnorum  inclinationes  (Prov.  21).  Ille  Deus  est,  qui  stabit  in  synagoga  Deorum,  et  in  medio  Deos  diiudicabit,  a  cuius  facie  concident  et  conterentur  reges  omnes  et  iudices  terrae,  quicunque  non  osculati  fuerint  Christum  eius;  qui  scripserint  leges  iniquas,  ut  opprimerent  in  iudicio  pauperes  et  vim  facerent [p. 511]  causae  humilium,  ut  viduas  haberent  in  praedam  et  pupillos  diriperent  (Psal.  82.  Psal.  2.  Ies.  10).  Atque  hic  mirabilis  eius  tum  bonitas,  tum  potentia,  tum  providentia  sese  profert.  Nam  modo  ex  servis  suis  manifestos  vindices  excitat,  ac  mandato  suo  instruit,  qui  de  scelerata  dominatione  poenas  sumant  et  oppressum  iniustis  modis  populum  e  misera  calamitate  eximant,  modo  furorem  aliud  cogitantium  et  aliud  molientium  hominum  eo  destinat.  Sic  populum  Israel  e  tyrannide  Pharaonis  per  Mosen  (Exod.  3),  e  violentia  Chusan,  regis  Syriae,  per  Othniel  (Iud.  2  seqq.),  ex  aliis  servitiis,  per  alios  vel  reges,  vel  iudices,  in  libertatem  asseruit;  sic  Aegyptiorum  insolentiam  per  Assyrios,  sic  Tyri  superbiam  per  Aegyptios,  ferociam  Babylonis  per  Medos  et  Persas,  regum  Iuda  et  Israel  ingratitudinem  per  Babylonios  contudit  et  afflixit;  quanquam  [OS  279]  non  eadem  omnia  ratione.  Priores  enim  illi,  quando  ad  edenda  talia  facinora,  legitima  Dei  vocatione  accersiti  erant,  in  reges  incurrendo,  minime  violabant  eam,  quae  divina  ordinatione  regibus  indita  est,  maiestatem,  sed  minorem  potestatem  maiore  coercebant,  perinde  ac  in  suos  satrapas  regibus  animadvertere  licet.  Hi,  tametsi  Dei  manu,  quo  illi  visum  erat,  destinabantur,  opusque  eius  inscientes  peragebant,  nihil  tamen  aliud  animo, [p. 512]  quam  scelus  volutabant.  Verum  utcunque  ipsa  hominum  facta  censeantur,  Dominus  tamen  per  ea  suum  aeque  opus  exequebatur,  cum  sanguinaria  regum  insolentium  sceptra  confringeret,  ac  intolerandas  dominationes  everteret.  Audiant  principes  et  terreantur.  Nobis  autem  interim  summopere  cavendum,  ne  illam  plenam  venerandae  maiestatis  magistratuum  autoritatem,  quam  Deus  gravissimis  edictis  sanxit,  etiam  si  apud  indignissimos  resideat  et  qui  eam  sua  nequitia,  quantum  in  se  est,  polluunt,  contemnamus  aut  violemus.  Neque  enim  si  ultio  Domini  est,  effrenatae  dominationis  correctio,  ideo  protinus  demandatam  nobis  arbitremur,  quibus  nullum  aliud  quam  parendi  et  patiendi,  datum  est  mandatum.