47:246  mentem  veniat  resurrectionis  gloria.  Ita  eum  vitam  fuisse  agnoscimus,  quia  cum  morte  congressus  magnifice  eam  devicit  et  nobilem  egit  triumphum.  18.  Nemo  tollit  eam  a  me.  Altera  consolatio  qua  se  discipuli  in  Christi  morte  sustentent,  quod  non  moritur  coactus,  sed  sponte  se  pro  salute  gregis  offert.  Porro  non  tantum  homines  necis  potestatem  in  se  habere  negat  nisi  quatenus  permiserit,  sed  a  qualibet  vi  necessitatis  se  eximit.  Alia  nostri  ratio  quibus  propter  peccata  imposita  est  moriendi  necessitas.  Natus  quidem  est  et  Christus  ipse  mortalis  homo,  sed  haec  voluntaria  submissio  fuit,  non  servitus  aliunde  iniuncta.  Munire  ergo  discipulos  suos  voluit  Christus,  ne  ipsum  paulo  post  ad  mortem  rapi  videntes  frangerentur  animis,  ac  si  oppressus  esset  ab  hostibus,  sed  mira  Dei  providentia  fieri  agnoscerent,  ut  mortem  pro  grege  redimendo  obiret.  Et  huic  doctrinae  perpetua  inest  utilitas,  quod  ideo  mors  Christi  piaculum  sit  pro  peccatis  nostris,  quia  voluntarium  fuit  sacrificium,  iuxta  iliud  Pauli:  Obedientia  unius  iusti  facti  sunt  multi  (Rom.  5,  19).  Haec  verba,  pono  eam  a  me  ipso,  bifariam  exponi  possunt,  vel  quod  se  vita  exuat  Christus,  manens  ipse  integer,  ac  si  quis  vestem  a  corpore  suo  deponeret,  vel  quod  suo  arbitrio  moriatur.  Hoc  mandatum.  Revocat  nos  ad  aeternum  patris  consilium,  ut  sciamus  tantam  illi  fuisse  curam  salutis  nostrae,  ut  filium  suum  unigenitum,  tantus  quantus  est,  nobis  dicaverit:  et  Christus  ipse  qui  in  mundum  venit,  ut  patri  se  obedientem  praeberet,  confirmat  se  non  alium  habere  in  omnibus  scopum  quam  ut  nobis  consulat.  19.  Dissidium  igitur  rursus  exstitit  inter  Iudaeos  propter  sermones  istos.  20.  Dicebant  autem  multi  ex  illis:  Daemonium  habet  ac  insanit:  quid  eum  auditis?  21.  Alii  dicebant:  Haec  verba  non  sunt  daemoniaci:  numquid  daemonium  potest  caecorum  oculos  aperire?  22.  Facta  sunt  autem  encaenia  Hierosolymis,  et  hiems  erat.  23.  Et  ambulabat  Iesus  in  templo  in  porticu  Salomonis.  24.  Circumdederunt  ergo  eum  Iudaei  ac  dixerunt  ei:  Quousque  animam  nostram  suspensam  tenes?  si  tu  es  Christus,  dic  nobis  libere.  25.  Respondit  eis  Iesus:  Dixi  vobis,  et  non  creditis:  opera  quae  ego  facio  in  nomine  patris  mei,  haec  testantur  de  me.  26.  Sed  vos  non  creditis,  quia  non  estis  ex  ovibus  meis,  quemadmodum  dicebam  vobis.  27.  Oves,  quae  meae  sunt,  vocem  meam  audiunt,  et  ego  cognosco  eas,  et  sequuntur  me.  28.  Et  ego  vitam  aeternam  do  eis  :  et  non  peribunt  in  aeternum,  nec  rapiet  eas  quisquam  e  manu  mea.  29.  Pater  meus,  qui  dedit  mihi,  maior  omnibus  est:  et  nemo  potest  rapere  e  manu  patris  mei.  30.  Ego  et  pater  unum  sumus.  19.  Dissidium  igitur.  Hic  fuit  fructus  concionis  Christi,  quod  aliquot  sibi  discipulos  acquisierit:  sed  16*