41:246  Postea  adiungit,  Disperget  spolia  et  praedam  et  bona,  quae  ipsis  fuerant.  Bizah  Vesalal,  quidam  referunt  ad  milites,  et  coniunctim  legunt  cum  verbo  Iibzor,  quasi  diceret,  militibus  suis  dispertiet  praedam,  ut  conciliet  sibi  eorum  animos,  et  ita  paret  ipsos  ad  nova  bella,  quoniam  scimus  facile  allici  milites,  ubi  percipiunt  uberes  fructus.  Nam  trahuntur  solo  quaestu  et  sua  avaritia.  Sic  igitur  quidam  exponunt,  quod  Antiochus  dividet  praedam  inter  suos  milites.  Sed  videtur  sensus  alter  mihi  melius  congruere,  quod  scilicet  disperget  praedam,  et  spolia,  et  bona  Aegyptiorum.  Postquam  ergo  oppresserit  ex  improviso  Aegyptios,  grassabitur  etiam  ad  ipsos  spoliandos  more  praedonis.  Postea  addit,  Et  super  munitiones  cogitabit  cogitationibus  suis,  id  est,  agitabit  consilia,  ut  etiam  urbes  munitas  occupet.  Principio  enim  penetravit  in  urbes  quasdam,  et  praesertim  Coelesyriam  occupavit,  postea  Phoenicen,  sed  non  potuit  tam  cito  potiri  urbibus  munitis.  Ergo  distulit  in  tempus  magis  opportunum  sua  consilia.  Et  ideo  dicit  angelus,  Adiiciet  etiam  sua  consilia  ad  urbes  munitas,  sed  ad  tempus,  hoc  est,  non  statim  proferet  quid  habeat  in  animo,  ut  possit  adhuc  opprimere  nepotem  suum  incautum,  deinde  ut  pacis  simulatione  semper  aditus  pateat  in  urbes  illas,  et  sibi  conciliet  quoscunque  corrumpere  poterit  vel  donis,  vel  aliis  artibus.  Videmus  ergo  hic  praedici  in  summa,  quibus  artibus  et  modis  Antiochus  aliqua  ex  parte  spoliaverit  nepotem  suum  urbibus  et  ditione,  nempe  quia  repente  rebus  tranquillis  invasit  urbes  non  adeo  validas:  deinde  paulatim  agitavit  consilia  quomodo  etiam  posset  in  urbes  magis  munitas  penetrare.  Ideo  dicit,  Ad  tempus.  Semper  apparet  calliditas  et  malitia  Antiochi  inter  omnes  istas  actiones.  Neque  enim  aperte  gessit  bellum,  sed  obliquis  fraudibus  semper  aliquid  ad  se  trahere  conatus  est,  quod  etiam  non  caruit  successu.  Quod  autem  dicit  facturum  quod  non  fecerunt  patres  eius,  et  patres  patrum,  restringitur  ad  Aegyptum  solam.  Nam  Seleucus  primus  rex  Syriae  late  est  dominatus,  deinde  feliciter  pugnavit  et  floruit  eius  nomen  usque  ad  ultimum  senium,  et  quamvis  tandem  infeliciter  pugnaverit,  tamen  fuit  summus  et  celeberrimus  bellator:  deinde  scimus  fuisse  unum  ex  praecipuis  ducibus  Alexandri  Magni.  Iam  quod  ad  filium  eius  Antiochum  spectat,  ante  vidimus,  quam  late  dominatus  sit,  deinde  quanta  fuerit  in  existimatione  et  prudentiae  et  virtutis.  Non  igitur  simpliciter  comparat  angelus  Antiochum  Epiphanem  cum  patre,  et  cum  avo,  et  proavo,  sed  respectu  Aegypti  duntaxat.  Patres  enim  eius  semper  inhiaverant  Aegypto,  sed  frustrati  fuerant  suis  consiliis.  Hic  autem  felicius  aggressus  est,  quod  frustra  tentaverant  eius  maiores.  Hinc  apparet,  Deum  sic  moderari  bellorum  eventus,  ut  vincat,  et  praevaleat  non  qui  consilio,  aut  prudentia,  aut  virtute  pollet,  sed  qui  coelesti  ductu  16*