27:246  moyen  de  maintenir  la  vraye  religion,  qu'on  punisse  ceux  qui  s'esleveront  a  l'encontre:  mais  plustost  que  nous  devons  nous  contenter  de  ce  glaive  spirituel,  pour  batailler  contre  Satan.  Ainsi  qu'on  soustienne  tousiours  la  verite:  et  si  le  monde  la  persecute,  que  nous  souffrions  cela  en  patience.  Mais  regardons  si  nostre  Seigneur  a  exclus  et  bannis  les  Princes,  et  Magistrats,  et  gens  de  iustice  de  son  troppeau,  tellement  qu'ils  ne  puissent  estre  Chrestiens?  Or  il  est  certain  que  non.  Car  quand  il  est  parle  du  royaume  de  nostre  Seigneur  Iesus  Christ,  notamment  il  est  dit:  Vous  Rois,  craignez,  et  vous  iuges  de  la  terre,  humiliez-vous,  et  baisez  tous  le  Fils.  D'avantage  devant  que  parler  aux  personnes  privees,  notamment  il  veut  que  les  Rois,  et  iuges,  et  gens  de  iustice  facent  hommage  a  nostre  Seigneur  Iesus  Christ  :  ils  sont  donc  appellez  a  la  cognoissance  de  l'Evangile.  Comme  de  faict  il  est  dit  au  Pseaume,  que  les  Rois  viendront  pour  s'assuiettir  a  celuy  qui  doit  estre  envoye  Redempteur:  et  puis  qu'ils  seront  nourriciers  de  l'Eglise,  et  que  les  Roynes  donneront  la  mammelle,  c'est  a  dire,  qu'il  faudra  que  ceux  qui  ont  le  glaive  de  iustice  en  la  main  prennent  l'Eglise  de  Dieu  en  sa  protection,  pour  la  maintenir  en  pure  doctrine,  et  en  la  religion  telle  qu'elle  est  contenue  en  la  parolle  de  Dieu.  Puis  qu'ainsi  est,  il  faut  conclurre  que  non  seulement  il  est  licite  a  tous  Rois,  et  a  tous  Magistrats  de  punir  les  heretiques,  et  ceux  qui  auront  perverti  la  pure  verite:  mais  que  cela  leur  est  enioint,  et  qu'ils  sont  lasches  envers  Dieu,  s'ils  permettent  que  les  erreurs  couvent,  et  qu'ils  n'y  mettent  point  ordre,  et  qu'ils  n'employent  point  la  toute  leur  puissance,  voire,  et  qu'ils  y  monstrent  plus  grand  zele  qu'en  tout  le  reste.  Car  est-ce  raison  que  celuy  qui  sera  au  siege  de  iustice,  quand  on  fera  tort  a  quelcun  de  cinq  sols,  qu'il  punisse  le  larron  :  et  cependant  qu'il  laisse  un  sacrilege  impuni  ?  Le  nom  de  Dieu  aura  este  blaspheme:  sa  verite  qui  est  son  image,  aura  este  comme  foullee  au  pied  :  et  c'est  bien  plus  que  si  on  avoit  deschire  quelques  armoiries.  Mais  voici  l'image  vive  de  Dieu  qui  est  en  opprobre,  et  comme  si  on  crachoit  a  l'encontre:  voila  le  salut  des  ames  qui  est  opprime:  et  les  Magistrats  seront  des  idoles  :  ils  punissent  un  larron  de  cinq  sols,  et  voila  un  sacrilege  qui  a  tasche  de  mesler  de  ciel  et  la  terre  :  et  il  faudra  que  celuy-la  demeure  impuni?  Et  ou  est-ce  aller?  Nature  n'enseigne-  elle  point  ici  ce  qui  est  de  faire?  Et  ceux  qui  diront,  qu'on  laisse  croistre  les  mauvaises  herbes,  ne  monstrent-ils  pas  qu'ils  sont  abrutis  comme  des  monstres,  qu'on  les  doit  tenir  plus  execrables  que  s'ils  estoyent  plus  qu'insensez?  Car  il  semble  qu'ils  vueillent  despitter  tout  ordre  de  nature,  et  voit-on  qu'ils  ne  parlent  point  seulement  contre  Dieu  :  mais  ils  empoisonnent  les  ames,  et  monstrent  qu'ils  n'ont  16*