6:245  DE  LIBERO  ARBITRIO.  potius  horribile  aspectu  [pag.  17]  chaos,  et  deformis  foedaque  rerum  omnium  confusio.  Nam  quod  vetustos  canones  nobis  iactat,  quibus  ordinata  et  formata  fuerat  ecclesia,  quid  hoc  ad  rem  pertinet,  quum  nihilo  maior  esset  eorum  usus,  quam  si  nunquam  fuissent  scripti?  Perinde  est  igitur,  ac  si  repressa  tyrannide  prodiret  aliquis  Dionysii  aut  Phalaridis  aulicus,  ac  turbatam  rempublicam  quiritaretur,  et  convulsas  leges,  iudicia  in  ordinem  coacta.  Quis  hunc  libertatis  et  legum  patronum  ferret?  Quod  si  hanc  similitudinem  non  recipiat  Pighius,  demonstret  mihi  velim,  quanto  melior  et  ordinatior  sit  status  sub  romano  Antichristo,  quam  sub  veteribus  tyrannis  fuerit.  Haec  pauca  cursim  respondere  visum  est  ad  Pighii  praefationem,  ne  quid  praeiudicii  de  ipsa  causa  facerent  lectores,  eius  calumniis  occupati:  quod  me  consequutum  esse  confido.  Nam  maledicta,  quibus  Lutheri  ingenium  moresque  proscindit,  non  est  praesentis  instituti  refellere:  quando  neque  ad  rem,  de  qua  agitur,  multum  momenti  habent,  neque  Lutherus  meo  patrocinio  opus  habet:  neque  postremo  aliud  agit  Pighius,  quam  vorax  et  famelicus  canis,  qui  latratu  se  ulciscitur,  dum  non  invenit  quod  rodat.  Nam  quae  eius  atrocissima  est  m  Lutherum  criminatio,  non  aliud  continet  quam  tartareum  esse  monstrum,  quia  gravibus  conscientiae  certaminibus  vexatus  saepe  fuerit  usque  ad  dolores  et  tormenta  inferorum.  At  vero  si  vel  per  somnium  concipere  posset  hic  nugator,  quid  hoc  sibi  velit  et  quid  valeat,  vel  obmutesceret,  vel  in  Lutheri  admirationem  potius  ac  laudes  converteretur.  Nam  quum  sit  haec  piorum  sors  communis,  ut  diros  subinde  conscientiae  cruciatus  sustineant,  quibus  eruditi  ad  veram  humilitatem  Deique  timorem  melius  assuefiant:  ut  singulari  prae  aliis  ingenii  praestantia  quisque  praeditus  est,  ita  miris  et  inusitatis  modis  interdum  tractatur:  ut  dicere  queat,  non  modo  se  mortis  doloribus  circumdatum  fuisse  et  obsessum,  sed  ab  [pag.  18]  inferis  ipsis  absorptum.  Ita  ex  sanctis  praestantissimos,  quasi  selectas  Dei  officinas  esse  oportet,  in  quibus  sua  iudicia  praeter  omnem  carnis  sensum  mirabiliter  exerceat.  Ne  recensendis  pluribus  exemplis  longior  sim:  haec  est  lucta  Iacob,  in  qua  nobilis  ille  athleta  non  hominum  quempiam  antagonistam  habuit,  sed  cum  Deo  ipso  congressus  est.  Nunc  si  comprehendere  animo  velis,  quantum  ille  sudarit  in  ea  arena,  Dei  fortitudinem  primum  intuere:  deinde,  hinc  quoque  coniecturam  sumas,  quod  victor  nihilominus  ad  finem  usque  vitae  claudicaverit.  Haec  piis  dicta  sint.  Nam  quid  Pighio  et  profanis  istis  hominibus  facias?  qui  nec  conscientiam  ullam,  nec  pietatis  sensum  habent,  nec  aliter  accipiunt  si  quid  de  iudiciis  Dei  narratur,  quam  si  de  conviviis  deorum  homericas  audirent  fabulas.