51:245  245PREMIER  SERMON.  Chap.  I,  v.  1.3.  En  lisant  les  Epistres  que  S.  Paul  a  escrites  ca  et  la,  nous  devons  tousiours  penser  que  Dieu  a  voulu  qu'elles  servissent,  non  pas  seulement  pour  un  temps  ou  pour  certains  peuples:  mais  a  iamais,  et  en  general  pour  toute  l'Eglise.  Et  de  faict,  quand  on  aura  bien  considere  la  doctrine  qui  y  est  contenue,  il  nous  sera  facile  de  iuger  que  Dieu  a  voulu  estre  escoute  en  ce  qui  est  ici  dit,  iusqu'a  la  fin  du  monde.  Et  aussi  il  a  eu  telle  solicitude  de  nous,  qu'il  n'a  rien  obmis  ni  oublie  de  ce  qui  nous  pouvoit  estre  profitable  a  nostre  salut.  La  somme  de  ceste  Epistre  que  nous  avons  maintenant  prinse  a  exposer,  est  que  sainct  Paul  conferme  ceux  qui  ont  este  auparavant  enseignez  en  l'Evangile,  a  fin  qu'ils  cognoissent  que  c'est  la  ou  il  le  faut  arrester,  comme  a  la  vraye  perfection  de  sagesse,  et  qu'il  n'est  point  licite  d'y  rien  adiouster.  Et  monstre  que  les  biens  qui  nous  ont  este  apportez  par  nostre  Seigneur  Iesus  Christ,  et  desquels  nous  sommes  faits  participans  par  le  moyen  de  l'Evangile,  sont  si  excellens,  qu'il  faut  que  nous  soyons  par  trop  ingrats,  si  nous  voltigeons  ca  et  la,  comme  n'ayans  point  de  repos  ou  contentement.  Et  la  dessus  aussi  il  monstre  ce  que  nous  avons  en  Christ,  a  fin  que  nous  soyons  tellement  retenus  en  luy,  que  nous  ne  presumions  point  d'emprunter  aucune  aide  de  coste  ne  d'autre,  scachant  que  nostre  Seigneur  Iesus  nous  a  apporte  le  tout.  Et  d'autre  part,  il  monstre  qu'il  a  si  bien  pourveu  a  son  Eglise,  que  si  nous  scavons  user  des  graces  qu'il  nous  offre,  nous  aurons  pleine  et  parfaite  felicite.  Et  cependant  il  exhorte  ceux  qui  ont  este  ainsi  enseignez  en  la  verite  de  l'Evangile,  de  cheminer  sainctement,  et  monstrer  qu'ils  ont  profite  (comme  ils  doyvent)  en  l'escole  de  Dieu.  Or  cela  n'est  pas  seulement  pour  la  ville  d'Ephese,  ne  pour  quelque  pays:  il  n'est  pas  pour  un  aage,  ou  pour  quelque  temps:  mais  nous  avons  besoin  d'estre  ainsi  avancez  de  plus  en  plus,  voyant  que  le  diable  machine  sans  fin  et  sans  cesse  de  nous  desbaucher.  Et  quand  il  ne  peut