41:245  245  IN  DANIELEM.  CAP.  XL  246  neque  tentabit  Aegyptum.  Magnum  enim  fuit  repellere  omnes  omnium  conatus,  qui  volebant  recuperare  ius  nepotis.  Et  minime  dubium  est  quin  gravata  fuerit,  et  fere  exhausta  illa  tota  regio  continuis  impensis  bellorum.  Nam  quum  subinde  surgerent  novi  motus,  oportuit  auxilia  hinc  inde  contrahere,  quod  fieri  non  poterat  sine  magno  sumptu.  Non  mirum  igitur  est  si  Antiochus,  ut  erat  callido  ingenio,  pacem  simulaverit  cum  nepote  suo  rege  Aegypti,  nempe  Ptolemaeo  Philometore,  quum  superstes  esset  soror  Cleopatra:  et  fuit  illa  honesta  excusatio.  Ergo  angelus  hic  primo  significat  fore  aliquas  inducias,  imo  fore  pacem  inter  Antiochum  et  regem  Aegypti.  Sed  tamen  adiungit  Antiochum  semper  fore  perfidum  in  suis  amicitiis.  A  coniunctionibus  ergo,  hoc  est,  post  coniunctiones  cum  ipso  faciet  dolum.  Quantumvis  ergo  praetexat  se  amicum  esse  et  socium  nepoti,  tamen  geret  se  dolose  cum  ipso:  et  adscendet,  inquit,  et  praevalebit  cum  exigua  manu,  nempe  quia  aggredietur  puerum  ex  inopinato.  Quum  enim  putaret  Ptolemaeus  sibi  firmam  esse  amicitiam  cum  avunculo,  facile  fuit  Antiocho  intercipere  per  fraudem  aliquas  urbes,  et  quidem  exigua  manu.  Fefellit  enim  hostem  suum  qui  putabat  omnia  sibi  tranquilla  esse.  Quum  ergo  Ptolemaeus  nihil  sibi  metueret  ab  avunculo,  repente  quaedam  urbes  illi  ereptae  sunt.  Hoc  intelligit  angelus.  Adscendet,  inquit,  nempe  per  dolum,  deinde,  praevalebit,  neque  magnis  copiis,  quia  nulla  erit  belli  suspicio.  Est  autem  facile  in  rebus  tranquillis,  ubi  nihil  timetur,  hostem  suum  opprimere.  Postea  adiungit,  24.  In  pace,  et  in  pinguedinibus  regionis  (aut  provinciae)  veniet  (hoc  est,  in  delitiis),  et  faciet  quae  non  fecerunt  patres  eius,  et  patres  patrum  eius  :  spolia  et  praedam,  et  substantiam  illis  dispertiet  (vel,  quae  illorum  fuit  disperget),  et  super  munitiones  cogitabit  cogitationes  suas,  idque  ad  tempus.  Continuus  est  historiae  tenor:  designat  enim  angelus  quomodo  Antiochus  tam  brevi  tempore,  et  exigua  manu  compos  futurus  sit  multarum  urbium,  nempe,  inquit,  veniet  in  pace,  et  delitiis  provinciae,  hoc  est,  opprimet  dormientes  et  securos.  Significat  ergo  Antiochum  fore  victorem,  quia  non  hostiliter  invadet  Aegyptum,  sed  astu  duntaxat  et  furtim  urbes  auferet  regi  Ptolemaeo  nihil  tale  metuenti.  Nulla  igitur  erit  belli  species.  Ideo  dicit,  Veniet  in  pace,  et  in  pinguedinibus  terrae.  Per  pinguedines  metaphorice  intelligit  delitias.  Quum  ergo  putarent  Aegyptii  se  procul  abesse  ab  omni  discrimine,  et  persuasi  essent  Antiochum  non  modo  sibi  amicum  esse,  sed  etiam  fore  adiutorem  si  quid  adversi  contingeret:  quum  ergo  ita  in  delitiis  suis  essent  demersi,  raptim  venit  Antiochus,  et  ita  praevaluit.