1:245  [CO  1.  245]  Cum  audimus,  a  Deo  impositum  esse  regem,  simul  illa,  de  honorando  et  timendo  rege  coelestia  edicta  animo  repetamus,  et  nequissimum  tyrannum  non  dubitabimus  eo  habere  loco,  quo  Dominus  ipsum  dignatus  fuerit.  Samuel,  cum  populo  Israel  denunciaret,  qualia  esset  a  regibus  suis  passurus  (1  Sam.  8):  Hoc  ius  erit  regis,  dicebat,  qui  regnabit  super  vos.  Filios  vestros  tollet  et  ponet  eos  ad  currum  suum,  ut  ponat  eos  pro  equitibus  suis  et  ut  arent  agros  suos,  et  messem  suam  metant,  et  arma  fabricentur;  filias  vestras  tollet,  ut  sint  pigmentariae,  coquae  et  pistrices;  agros  denique  vestros,  vineas  vestras  et  oliveta  optima  auferet,  et  dabit  servis  suis;  semina  vestra  et  vineas  vestras  decimabit,  et  dabit  eunuchis  et  servis  suis;  servos  vestros,  ancillas,  et  asinos  tollet  et  adhibebit [p. 507]  operi  suo;  quin  et  greges  vestros  decimabit,  et  vos  eritis  servi  illius.  Certe  non  id  iure  facturi  erant  reges,  quos  optime  ad  omnem  continentiam  lex  instituebat  (Deut.  17),  sed  ius  in  populum  vocabatur,  cui  parere  ipsi  necesse  esset,  nec  obsistere  liceret.  Ac  si  dixisset  Samuel:  eo  se  proripiet  licentiae  regum  libido,  quam  cohibere  vestrum  non  erit,  quibus  hoc  restabit  unum,  iussa  excipere  ac  dicto  audientes  esse.  In  primis  autem  insignis  est  et  memorabilis  apud  Ieremiam  locus  (Ier.  27):  quem,  tametsi  prolixiorem,  ideo  non  pigebit  referre,  quia  totam  hanc  quaestionem  clarissime  definit.  Ego  feci  terram  et  homines,  ait  Dominus,  et  animalia  quae  sunt  in  superficie  terrae,  in  fortitudine  mea  magna,  et  brachio  ex-  [OS  277]  tento,  et  ipsam  trado  ei,  qui  placuerit  in  oculis  meis;  et  nunc  itaque  ego  dedi  omnes  terras  istas  in  manum  Nabuchadnezar  servi  mei,  et  servient  ei  gentes  omnes  et  reges  magni,  donec  tempus  veniet  terrae  eius;  eritque  ut  gens  et  regnum,  quae  non  servierint  ei,  et  non  posuerint  collum  suum  sub  iugum  regis  Babel,  visitabo  gentem  illam  in  gladio,  fame  et  peste;  quare,  servite  regi  Babel  et  vivite.  Videmus  quanta  obedientia  Dominus  tetrum  illum  ferocemque  tyrannum  coli  voluerit,  non  alia  ratione,  nisi  quia  regnum  obtinebat.  Id  autem [p. 508]  ipsum  erat,  Domini  decreto,  in  solium  regni  impositum  esse,  ac  in  regiam  maiestatem  assumtum,  quam  violare  nefas  esset.  Hoc  nobis  si  assidue  ob  animos  et  oculos  obversetur,  eodem  decreto  constitui  etiam  nequissimos  reges,  quo  regum  autoritas  statuitur,  nunquam  in  animum  nobis  seditiosae  illae  cogitationes  venient:  tractandum  esse  pro  meritis  regem,  nec  aequum  esse  ut  subditos  ei  praestemus,  qui  vicissim  regem  nobis  non  praestet.  Est  apud  eundem  prophetam  alterum  quoque  Domini  mandatum  (Ier.  29):  quo  iubet  populum  suum  quaerere  pacem  Babylonis,  in  quam  captivi  abducti  essent,  et  orare  ad  se  pro  ea,  quoniam  in  pace  eius  futura  esset  pax  eorum.  Ecce,  Israelitae  fortunis  omnibus  exuti,  e  domibus  suis  avulsi,  in  exilium  abacti,  in