50:244  2.  Ecce,  ego  Paulus.  Nihil  gravius  potuit  illis  denuntiare  quam  ut  eos  prorsus  a  Christi  gratia  excluderet.  Sed  quid  hoc  sibi  vult,  Christum  nihil  profuturum  omnibus  circumcisis?  An  Abrahae  nihil  profuit?  imo  ut  prodesset,  circumcisionem  recepit.  Si  dicamus  id  valuisse  ante  Christi  adventum,  quid  de  Timotheo  respondebimus?  Notandum  est,  Paulum  hic  non  loqui  de  externa  modo  sectione,  aut  de  caeremonia,  sed  magis  disputare  adversus  impiam  doctrinam  pseudoapostolorum,  qui  eam  fingebant  esse  necessarium  Dei  cultum  et  simul  fiduciam  ingerebant  tanquam  operis  meritorii.  Haec  diabolica  figmenta  Christum  faciebant  inutilem.  Non  quod  abnegarent  pseudoapostoli  Christum,  aut  penitus  sublatum  vellent:  sed  inter  ipsius  gratiam  et  legis  opera  sic  partiebantur,  ut  dimidia  tantum  pars  salutis  ab  illo  esset  Reclamat  apostolus,  non  posse  hoc  modo  dividi:  nec  aliter  nobis  prodesse,  quam  si  ipsum  integrum  amplectamur.  Et  quid  aliud  hodie  faciunt  papistae,  nisi  quod  pro  circumcisione  nugas  a  se  inventas  obtrudunt?  huc  certe  tendit  tota  eorum  doctrina,  ut  Christi  gratia  operum  meritis  permisceatur:  quod  impossibile  est.  Christum  enim  dimidium  quisquis  habere  vult,  totum  perdit.  ]  Et  tamen  valde  sibi  acuti  videntur  papistae,  quum  allegant  operibus  se  nihil  tribuere,  nisi  mediante  Christi  gratia.  Quasi  vero  alius  fuerit  Galatarum  error.  Neque  enim  a  Christo  deficere  se  credebant,  aut  renuntiare  eius  gratiae:  sed  peribat  tamen  illis  Christus,  quum  adulterata  esset  evangelii  doctrina  in  praecipuo  illo  capite.  Ista  loquutio:  Ecce  ego  Paulus,  non  parvam  emphasin  habet.  Coram  enim  se  opponit  et  nomen  dat,  ne  videatur  causam  dubiam  habere.  Et  quamquam  vilescere  apud  Galatas  coeperat  eius  autoritas,  tamen  ad  refellendos  omnes  adversarios  sufficere  asserit.  3.  Testificor  enim  rursum.  Probatio  est  proximae  sententiae,  sumpta  ex  loco  repugnandum.  Nam  qui  debitor  est  totius  legis  faciendae,  mortem  nunquam  effugiet,  quia  semper  manebit  sub  reatu.  Nemo  enim  unquam  reperietur,  qui  legi  satisfaciat.  Talis  igitur  obligatio  certa  est  damnatio  hominis.  Ita  fit  ut  nihil  ipsum  Christus  iuvet.  Videmus  ergo  ut  repugnent  ista  duo,  nos  esse  Christi  gratiae  participes,  et  rursum  obstringi  ad  totam  legem  implendam.  Verum  ita  sequetur,  neminem  ex  patribus  salvum  esse.  Quin  etiam  sequetur,  Timotheum  a  Paulo  fuisse  perditum  quum  fuit  circumcisus.  Vae  enim  nobis,  donec  a  lege  sumus  manumissi.  Ubi  autem  circumcisio,  illic  subiectio.  Notandum  est,  Paulum  bifariam  de  circumcisione  solere  loqui:  idque  animadvertere,  cuivis  in  Pauli  lectione  mediocriter  exercitato  facile  erit.  Nam  ad  Rom.  cap.  4,  l  l  vocat  sigillum  iustitiae  fidei.  Ita  Christum  et  gratuitam  salutis  promissionem  sub  circumcisione  includit.  Nunc  autem  illam  Christo,  fidei,  evangelio