5:244  [pag.  8]  Principio  in  id  nos,  velut  defixis  oculis  semper  intueri  convenit,  quod  discipulis  suis  omnibus  proponit  Christus,  dum  primo  eos  scholae  suae  tirocinio  initiat.  Nam  ubi  a  sui  ipsorum  abnegatione  crucisque  tolerantia  auspicari  eos  docuit,  simul  et  hoc  subiicit  (Luc.  9,  26):  Qui  me  et  meos  sermones  erubuerit  coram  hominibus,  hunc  filius  hominis  erubescet,  quum  venerit  in  maiestate  sua,  et  patris,  et  sanctorum  angelorum.  Hoc  ergo  nobis  a  Christo  Domino,  quum  in  eius  familiam  primum  adscribimur,  edici  meminerimus:  hoc  perpetuum  esse  edictum,  in  omnem  vitam  iis  promulgatum,  qui  in  eius  regno  censeri  volent:  ut  si  vera  cordis  pietate  eius  amplexi  sunt  doctrinam,  eam  ipsam  cordis  pietatem  externa  professione  declarent.  Et  sane,  quanta  fuerit  improbitas,  eum  nolle  inter  homines  profiteri,  a  quo  se  coram  angelis  agnosci  velint;  et  quam  sibi  in  coelo  constare  velint  Dei  veritatem,  in  terra  abnegare?  Quare  non  est  quod  callida  dissimulatione  iam  hic  sibi  quisquam  placeat,  aut  falsa  pietatis  opinione  blandiatur,  eam  se  fovere  in  corde  fingens,  quam  externis  testificationibus  prorsus  evertat.  Vera  enim  pietas,  veram  confessionem  parit.  Nec  vanum  haberi  debet  quod  ait  Paulus  (Rom.  10,  10):  Quemadmodum  corde  ad  iustitiam  creditur,  ita  ore  fieri  confessionem  ad  salutem.  Denique  suos  ad  confessionem  vocat  Dominus:  quam  qui  detrectant,  alium  sibi  magistrum  quaerant  oportet:  quando  ab  eo  ferri  cuml)  sua  simulatione  non  possunt.  Quaerat  hic  quispiam:  Num  igitur  qui  inter  impiam  ac  superstitiosam  multitudinem  pauci  ac  dispersi  vivunt  fideles,  iis,  quo  fidem  suam  rite  testificentur,  necesse  sit  opportune,  importune,  publice  simul  ac  privatim  in  suorum  popularium  impietatem  vociferari?  ad  praedicandam  Dei  veritatem  plateas  occupare?  suggestus  conscendere?  conciones  advocare?  Minime  id  vero.  Quin  potius  quum  peculiariter  ad  verbi  sui  ministerium  accersat  Dominus  sive  apostolos,  sive  prophetas,  sive  nuncios,  seu  quo  alio  nomine  appellare  libet,  quorum  voces  publice  personare  velit:  idem  ab  omnibus  passim  tentari  adeo  necesse  non  est,  ut  nec  omnino  expediat,  ac  ne  deceat  quidem.  Quamobrem  hoc  agendum  magis,  ut  singuli  quid  vocationi  suae,  suoque  ordini  conveniat,  pro  se  quisque  cogitent:  cui  si  optime  respondeant,  quod  officii  sui  est  praestabunt  etiam  optime.  Quos  verbi  sui  ministerio  Dominus  destinat,  iis  veluti  publicam  personam  imponit,  ut  eorum  vox  in  luce  versetur,  et  super  tecta,  ac  tanquam  tubae  clangor  exaltetur.  Caeteris  sic  a  publico  apostolorum  munere  abstinendum  est,  ut  privatae  tamen  vitae  [pag.  9]  officiis  Christianos  se  esse  profiteantur.  Hoc  quia  tanta  brevitate  commode  explicari  non  potest,  quale  sit,  plu-  1)  cum,  omittunt  edd.  rece.  1576  seqq.