47:244  16.  Alias  oves  habeo.  Quanquam  nonnulli  ad  omnes  promiscue  hoc  referunt  tam  ex  Iudaeis  quam  ex  gentibus,  qui  nondum  erant  Christi  discipuli,  mihi  tamen  dubium  non  est  quin  ad  gentium  vocationem  respexerit.  Ovile  enim  appellat  veteris  populi  collectionem,  qua  a  reliquis  mundi  populis  diremptus  in  Dei  peculium  et  unum  corpus  coaluerat.  Sic  enim  Iudaeos  sibi  cooptaverat  Deus,  ut  ritus  et  caeremonias  velut  quaedam  septa  illis  circumdaret,  ne  incredulis  permixti  essent,  quanquam  ostium  stabuli  gratuitum  erat  vitae  aeternae  foedus  in  Christo  sancitum.  Ideo  alias  oves  vocat  quae  non  eiusdem  erant  notae,  sed  diversi  generis.  Summa  est,  pastorale  Christi  officium  Iudaeae  angulis  non  includi,  sed  longius  patere.  Verum  quidem  est  quod  hic  dicit  Augustinus,  sicut  intra  ecclesiam  multi  sunt  lupi,  ita  foris  multas  esse  oves  :  sed  praesenti  loco  non  per  omnia  convenit,  ubi  de  externa  ecclesiae  facie  agitur,  propterea  quod  gentes,  quae  ad  tempus  extraneae  erant,  postea  in  regnum  Dei  simul  cum  Iudaeis  ascitae  sunt.  Quadrare  tamen  hac  in  parte  fateor,  quod  oves  nominat  Christus  incredulos,  qui  nihil  minus  quam  oves  in  se  aestimari  poterant.  Nec  vero  tantum  hoc  nomine  quales  futuri  sint  docet,  quin  potius  ad  arcanam  patris  electionem  hoc  refert,  quia  iam  oves  sumus  Deo,  antequam  ipsum  sentiamus  nobis  esse  pastorem:  quemadmodum  alibi  dicimur  fuisse  inimici  quo  tempore  nos  amabat  (Rom.  5,  10):  qua  ratione  etiam  Paulus  dicit  nos  prius  a  Deo  fuisse  cognitos  quam  illum  cognosceremus,  Galat.  4,  9.  Illas  etiam  oportet.  Significat  ratam  fore  electionem  Dei,  ut  nihil  pereat  quod  salvum  esse  velit.  Nam  arcanum  Dei  consilium,  quo  ordinati  sunt  ad  vitam  homines,  tandem  suo  tempore  patefacit  vocatio:  et  quidem  efficax,  dum  sibi  spiritu  in  filios  regenerat,  qui  prius  ex  carne  et  sanguine  geniti  erant.  Quaeritur  tamen  quomodo  adducti  fuerint  gentiles  ut  Iudaeis  aggregarentur:  neque  enim  Iudaeos  foedus,  quod  cum  patribus  Deus  pepigerat,  abiicere  oportuit,  ut  Christo  nomen  darent,  nec  rursum  gentes  legis  iugum  subire  oportuit,  ut  in  Christum  insiti  Iudaeis  associarentur.  Hic  tenenda  est  distinctio  inter  foederis  substantiam  et  externas  accessiones.  Nam  aliter  in  Christi  fidem  concedere  non  poterant  gentes  quam  aeternum  illud  foedus  amplexando,  in  quo  fundata  erat  mundi  salus.  Hoc  modo  impleta  fuerunt  vaticinia:  Loquentur  alienigenae  lingua  Canaan  (Ies.  19,  18).  Item:  Apprehendent  septem  ex  gentibus  pallium  unius  Iudaei,  ac  dicent:  Ambulabimus  vobiscum  (Sach.  8,  23).  Item  :  Venient  ex  longinquis  partibus  et  adscendent  in  montem  Sion,  Ideo  etiam  multarum  gentium  pater  Abraham  fuit  dictus,  quia  ab  oriente  et  occidente  venturi  erant,  qui  cum  eo  accumberent  in  regno  Dei  (Matth.  8,  l  l  )  .  Quantum  autem  ad  caeremonias  attinet,  ille  est