41:244  Coniicere  promptum  est  non  fuisse  statim  pacatam  ditionem  Antiocho,  quoniam  pars  aulae  favebat  legitimo  haeredi.  Sicut  ergo  in  rebus  novis  fieri  solet,  multi  fuerunt  tumultus  in  Syria,  antequam  adversarios  e  medio  tolleret  Antiochus.  Quanquam  autem  tunc  regnum  Aegypti  destituebatur  capite  (erat  enim  tantum  Ptolemaeus  Philometor,  quem  vocabant  hoc  modo)  tamen  consiliarii  pueri  illius,  quum  magis  studerent  filio  Seleuci,  occultis  subsidiis  opem  tulerunt  adversae  factioni.  Fuit  igitur  negotium  Antiocho  non  tantum  cum  suis  popularibus,  sed  etiam  cum  gentibus  vicinis.  Nam  miserabantur  sortem  pupilli  omnes,  deinde  indignitas  ipsa  multos  movebat,  ut  ferrent  aliquid  auxilii.  Adiutus  ergo  fuit  Aegypti  favore,  et  aliarum  gentium  puer  ille.  Ita  Antiochus  sustinuit  multos  et  graves  motus.  Sed  angelus  pronuntiat  fore  victorem.  Inundabuntur,  inquit,  brachia.  Metaphorice  sic  vocat  quaecunque  auxilia  contraxit  filius  Seleuci,  non  proprio  consilio  (neque  enim  poterat)  sed  per  suos  comites.  Brachia  ergo,  hoc  est,  omnia  auxilia  quae  convenient  ad  restituendum  filium  Seleuci,  inundabuntur  inundatione.  Est  altera  metaphora,  id  est,  obruentur  quasi  diluvio.  Et  hac  figura  subindicat  angelus  non  modo  fore  victorem  Antiochum,  sed  etiam  facilem  fore  eius  victoriam,  quoniam  erit  instar  diluvii,  non  sua  virtute,  sed  quoniam  volebat  Deus  per  manum  illius  tyranni  affligere  Israelitas,  ut  postea  videbimus,  et  simul  etiam  vexare  tam  Aegyptum,  quam  Syriam.  Fuit  denique  flagellum  Dei  Antiochus,  ideo  confertur  diluvio.  Et  ideo  dicit,  a  conspectu  eius.  Ostendit  enim  tantum  fore  terrorem  Antiochi,  ut  solo  adspectu  deiiciat  atque  prosternat  hostes  suos,  etiam  si  careat  viribus,  neque  sit  industrius  vel  strenuus  bellator.  Et  conterentur,  inquit,  atque  etiam  dux  foederis,  hoc  est  Ptolemaeus  frustra  studebit  partibus  sui  consobrini.  Erat  enim  filius  Seleuci  consobrinus  Ptolemaei  Philometoris,  quoniam  ut  dictum  fuit,  Cleopatra  nupserat  Ptolemaeo  Philopatori,  unde  genitus  fuit  ille  Philometor,  et  Seleucus  frater  erat  Cleopatrae.  Dux  ergo  ipse  foederis.  Non  quod  potuerit  proprio  consilio  quidquam  aggredi  aut  gerere  Ptolemaeus,  qui  adhuc  puer  erat,  sed  tanta  erat  dignitas  in  regno  Aegypti,  ut  merito  vocetur  Dux  foederis,  quoniam  alii  omnes  sequuti  sunt  potentiam  regis  illius.  Hoc  quoque  eventu  comprobatum  fuit,  quoniam  infeliciter  pugnarunt  omnes  qui  conati  sunt  eiicere  Antiochum  ex  regni  possessione.  Nunc  sequitur,  23.  Et  a  coniunctione  cum  eo  faciet  dolum,  et  adscendet,  et  praevalebit  cum  exigua  gente  (vel  manu).  Significat  angelus  aliquam  intermissionem  bellorum,  quia  Antiochus  contentus  erit  ad  tempus  Syria,