27:244  ennemis  fussent  prochains,  que  nous  fussions  desia  assiegez,  qu'on  craignist  l'assaut  a  chacune  minute  de  temps:  n'y  prouvoiroit-on  point?  Or  il  n'est  point  question  ici  que  nostre  ennemi  tant  seulement  soit  prochain  de  nous:  mais  il  y  a  desia  entree.  Quand  nous  oyons  ses  mensonges,  et  qu'ils  ne  sont  point  repoussez,  et  qu'on  n'en  tient  conte,  il  semble  que  nous  vueillions  perir  de  nostre  bon  gre:  comme  aussi  nous  en  sommes  dignes.  Et  quant  aux  Pasteurs,  il  faut  qu'ils  ayent  double  voix.  Car  nous  devons  recueillir  les  brebis  tant  qu'il  sera  possible:  quand  elles  sont  au  troupeau,  nous  les  devons  tenir  la  coyement:  mais  s'il  y  a  des  loups,  et  des  larrons  qui  vueillent  envahir  le  troupeau,  nous  devons  crier  haut  et  clair:  Au  loup.  Mais  cependant  il  faut  aussi  que  ceux  qui  ont  le  glaive  en  la  main  y  provoyent,  et  qu'un  chacun  selon  sa  faculte  s'efforce  que  l'Eglise  de  Dieu  ne  soit  point  infectee  de  telle  poison,  et  que  le  diable  n'ait  point  la  vogue  pour  falsifier  la  pure  verite,  pour  s'eslever  contre  Dieu,  pour  renverser  la  droite  religion:  bref  pour  tout  pervertir:  que  nous  devons  empescher  cela  tant  qu'il  nous  sera  possible.  Pour  ceste  cause  notons,  que  Dieu  a  voulu  que  les  faux-prophetes  fussent  exterminez  du  milieu  de  son  peuple.  Or  de  prime  face  il  semble  bien  que  ceste  loy  soit  par  trop  rigoreuse:  car  pour  avoir  parle,  faut-il  qu'on  soit  ainsi  puni?  Mais  c'est  merveilles,  quand  on  aura  parle  contre  un  homme  mortel,  on  souffrira  bien  qu'il  y  ait  punition:  et  quand  on  aura  blaspheme  le  Dieu  vivant,  on  voudroit  que  cela  demeurast  impuni.  On  cognoist  quel  zele  il  y  a  en  ceux  qui  voudroyent  qu'une  telle  rigueur  fust  abolie.  Si  un  prince  a  este  iniurie,  il  semblera  que  la  mort  soit  peu  de  chose,  et  qu'on  ne  sera  point  assez  venge:  que  quelcun  qui  aura  parle  contre  son  authorite  sera  puni,  et  nul  ne  criera  a  l'encontre.  Si  on  trouve  malice  en  un  homme,  qu'il  ait  voulu  procurer  quelque  revolte,  qu'il  ait  voulu  esmouvoir  sedition  en  un  peuple:  et  bien,  la  teste  y  va,  on  ne  dira  point  qu'une  telle  loy  soit  inique  et  mauvaise.  Et  pourquoy?  C'est  pour  conserver  l'estat  commun,  et  la  police.  Et  cependant  voici  Dieu  qui  a  l'empire  souverain,  et  il  se  dressera  un  ver  de  terre  contre  luy,  il  taschera  de  luy  ravir  son  honneur,  et  luy  rabbaisser  son  empire,  et  sa  superiorite:  et  ce  sera  tout  un,  que  cela  s'escoule:  et  puis  qu'il  n'est  question  que  de  parolles,  il  n'y  a  point  de  propos  qu'il  s'en  ensuyve  une  telle  punition.  Or  ceux  qui  parlent  ainsi,  monstrent  bien  qu'ils  n'ont  nulle  affection  a  Dieu:  mais  qui  pis  est,  qu'ils  voudroyent  que  tout  fust  mesle  en  confusion,  et  qu'on  se  mocquast  et  de  Dieu,  et  de  sa  maieste,  que  toute  religion  fust  en  moquerie,  et  en  opprobre:  bref,  quiconques  parle  ainsi,  il  ne  le  faut  point  reputer  ignorant,  quand  il