10.1:244  enim,  quum  videret  adulterinum  coniugium  tractari,  quid  aliud  fuit  quam  subscribere?  Certe  turpissimi  lenocinii  rea  tenetur,  quae  volens  et  sciens  marito  permisit  se  ita  prostituere.  Rogabis,  quisnam  ergo  sit  exitus.  Certe  nisi  hominibus  conceditur,  ut  peccando  maiorem  peccandi  licentiam  sibi  acquirant,  uterque  prima  fide  manet  devinctus:  neque  alia  solutionis  ratio  apparet,  nisi  ut  vir  se  adulterum  fuisse  fateatur,  ubi  ad  secundam  uxorem  praepostere  transiit:  mulier  se  quoque  sociam  criminis  agnoscat,  imo  primam  culpae  originem  in  se  residere.  Nunc  si  ad  priorem  redire  nolit  ille,  suberit  non  parva  collusionis  suspicio,  et  res  erit  mali  turpisque  exempli.  Mulieri  quae  divortium  temere  fecit,  non  video  liberum  esse  ius  nubendi,  donec  se  ad  reconciliationem  obtulerit.  Quid  faciet  ille?  nisi  valde  fallor,  perplexum  haerere  necesse  erit.  Ego  igitur  quid  pronunciem,  nisi  perspectis  melius  circumstantiis,  non  reperio.  Ac  te  rogo,  eximie  vir,  ut  meae  dubitationi  ignoscas,  si  de  re  adeo  confusa  inter  homines  ignotos  iudicium  ferre  non  audeo.  Plus  forte  aliquid  a  me  exspectasti:  boni  consules  quod  possum.  Vale  frater  mihi  honorande.  Dominus  tibi  semper  adsit,  te  gubernet  spiritu  prudentiae  et  rectitudinis,  praesidio  tueatur,  et  virtute  sustineat.  3.  Calendas  Ianuarii  1557.