1:244  [CO  1.  244]  munus  esse  magistratum,  ad  salutem  hominum  conservandam,  testatur  Dominus,  ac  suos  magistratibus  ipsis  fines  praescribit,  simul  tamen  declarat,  qualescunque  sint,  non  nisi  a  se  habere  imperium.  Eos  quidem,  qui  publico  bono  imperant,  vera  eius  suae  beneficentiae  exemplaria  esse  et  specimina,  qui  vero  iniuste  et  impotenter  dominantur,  eos  ad  vindicandam  populi  iniquitatem  a  se  excitatos;  omnes  ex  aequo  sancta  illa  maiestate  esse  praeditos,  qua  legitimam  potestatem  instruxit.  Non  ultra  progrediar,  donec  certa  eius  rei  aliquot  testimonia  subiecero  (Iob.  34.  Os.  13.  Ies.  10).  Nec  tamen,  quo  furorem  Domini  super  terram  esse  impium  regem  confirmemus,  laborandum  est:  quando  neminem  futurum  arbitror,  qui  reclamet,  nec  sic  de  rege  plus  dictum  fuerit,  quam  de  praedone  qui  rem  tuam  diripiat,  de  adultero  qui  thorum  tuum  polluat,  de  sicario,  qui  te  ad  caedem  appetat,  cum  huiusmodi  calamitates  omnes,  inter  Dei  maledictiones  scriptura  recenseat  (Deut.  28).  Verum  in  eo  probando  insistamus [p. 505]  magis,  quod  non  ita  facile  in  hominum  mentes  cadit:  in  homine  deterrimo  honoreque  omni  indignissimo,  penes  quem  modo  sit  publica  potestas,  praeclaram  illam  et  divinam  potestatem  residere,  quam  Dominus  iustitiae  ac  iudicii  sui  ministris  verbo  suo  detulit,  eumque  a  subditis  eadem  in  dignatione  habendum  (quantum  ad  publicam  obedientiam  attinet)  qua  optimum  regem,  si  daretur,  habituri  essent.  Principio  velim  animadvertant  seduloque  observent  lectores,  illam  quae  non  sine  causa  toties  nobis  in  scripturis  commemoratur  Dei  providentiam  ac  singularem  actionem  in  distribuendis  regnis,  statuendisque  quos  illi  visum  [OS  276]  fuerit  regibus.  Apud  Danielem  (Dan.  2):  Dominus  mutat  tempora  et  vices  temporum;  abiicit  reges  et  instituit;  item  (Dan.  4):  Ut  cognoscant  viventes,  quod  potens  sit  altissimus  in  regno  hominum;  cui  ipse  voluerit,  dabit  illud.  Cuiusmodi  sententiis  cum  passim  abundet  scriptura,  illa  tamen  prophetia  peculiariter  scatet.  Iam,  qualis  rex  fuerit  Nabuchadnezar,  is  qui  Ierusalem  expugnavit,  satis  scitur:  nempe  strenuus  alienorum  invasor  ac  populator.  Dominus  tamen  apud  Ezechielem  (Ez.  29)  se  illi  terram  Aegypti  dedisse  affirmat,  pro  operatione,  qua  sibi  in  vastanda  Aegypto  servivisset.  Et  illi  dicebat  Daniel  (Dan.  2):  Tu  rex,  rex  es  regum,  cui  Deus [p. 506]  coelorum  dedit  regnum  potens  ac  forte  atque  gloriosum;  tibi  inquam  dedit,  et  omnes  terras  ubi  habitant  filii  hominum,  bestiae  sylvestres  et  volucres  coeli,  eas  tradidit  in  manum  tuam,  ac  fecit  te  dominari  eis.  Rursum  eius  filio  Belsazar  (Dan.  5):  Deus  altissimus  dedit  Nabuchadnezar  patri  tuo  regnum  et  magnificentiam,  honorem  et  gloriam,  et  propter  magnificentiam  quam  dedit  illi,  omnes  populi,  tribus  et  linguae  fuerunt  trementes  et  timentes  a  conspectu  eius.