55:243  243  EPIST.  PETRI  I  244  fere  detestabiles.  Eo  itaque  magis  studendum  erat,  ut  sancta  vita  et  moribus  recte  compositis,  odium  ac  infamiam  nominis  sui  delerent.  Tenenda  enim  est  illa  Pauli  admonitio,  ne  detur  occasio  iis  qui  eam  captant  (2.  Cor.  l  l  ,  12).  Itaque  impiorum  maledicentiae  et  sinistri  sermones,  stimuli  nobis  esse  debent  ad  recte  vivendum.  Neque  enim  secure  oscitandi  tempus  est,  dum  illi  ad  observandum  quidquid  delinquimus,  acriter  vigilant.  Glorificent  Deum.  Significat  non  esse  nostra  causa  laborandum,  ut  bene  de  nobis  sentiant  homines  ac  loquantur:  sed  quaerendam  esse  Dei  gloriam:  quemadmodum  et  Christus  docet.  Modum  autem  ostendit  Petrus:  nempe  quod  bonis  nostris  operibus  adducti  infideles,  se  quoque  Deo  subiicient;  atque  ita  in  suae  conversionis  ratione  dabunt  Deo  gloriam.  Hoc  enim  significat  dies  visitationis.  Scio  quosdam  ad  extremum  Christi  adventum  referre:  sed  ego  aliter  accipio:  quod  scilicet  Deus  sancta  et  honesta  suorum  vita,  tanquam  praeparatione  utetur,  ut  in  viam  errantes  reducat.  Hoc  enim  conversionis  nostrae  initium  est,  quum  Deus  paterno  oculo  respicere  nos  dignatur:  si  autem  adversa  est  eius  a  nobis  facies,  periimus.  Quare  dies  visitationis  merito  dicitur,  dum  nos  ad  se  revocat.  13.  Subditi  ergo  estote  omni  humanae  ordinationi  propter  Dominum:  sive  regi,  tanquam  supereminenti:  14.  sive  praesidibus,  tanquam  iis  qui  per  ipsum  mittuntur,  in  vindictam  quidem  maleficorum,  laudem  vero  bene  agentium*  15.  Sic  enim  est  voluntas  Dei,  ut  benefaciendo  obstruatis  ignorantiam  stultorum  hominum.  16.  Ut  liberi,  et  non  quasi  praetextum  habentes  malitiae  libertatem:  sed  tanquam  servi  Dei.  13.  Subditi  ergo  estote7  ete.  Nunc  ad  particulares  exhortationes  descendit.  Et  quoniam  obedientia  erga  magistratus,  pars  est  honestae  conversationis,  ideo  ex  hac  colligit,  subditi  ergo  estote.  Nam  imperii  iugum  detrectando,  non  parvam  obloquendi  occasionem  gentibus  dedissent.  Et  sane  hoc  potissimum  nomine  odiosi  et  infames  erant  Iudaei,  quod  propter  suam  pervicaciam,  indomiti  habebantur.  Et  quoniam  motus,  quos  in  provinciis  excitabant,  magnarum  calamitatum  causae  erant:  ut  quisque  quieto  ac  pacato  erat  ingenio,  ita  ab  illis  tanquam  a  peste  aliqua  abhorrebat.  Haec  etiam  causa  Petrum  impulit  ut  de  subiectione  tam  sedulo  praeciperet.  Adde  quod  evangelium  multi  putabant  tale  esse  praeconium  libertatis,  ut  se  quisque  a  servitute  eximere  posset.  Indignum  esse  videbatur,  servire  Dei  filios,  et  mundi  haeredes  ne  corporis  quidem  sui  liberam  habere  potestatem.  Accedebat  tunc  alia  tentatio,  quod  magistratus  omnes  Christi  erant  adversarii,  suoque  imperio  abutebantur:  ita  nulla  in  illis  relucebat  imago  Dei,  quae  praecipuam  reverentiam