5:243  EPISTOLA  I.  quominus  sese  velut  devotam  arae  victimam  in  cruciatum  alacriter  daret,  iure  id  quidem  facit.  Sed  simul  cogitet,  ipsum  una  hac  cogitatione  infractam  illam  animi  magnitudinem  ad  extremum  sustentasse  :  quod  quum  mentem  in  Dei  mandatum,  quo  ad  pietatis  confessionem  vocabatur,  cogitationemque  defixam  penitus  haberet:  simul  a  talibus  spectaculis,  quorum  terrore  vacillare  poterat,  [pag.  7]  totam  avertebat.  Vocem  ergo  edidit  ad  omnem  quidem  immortalitatem  consecrandam,  sed  non  laude  magis  quam  imitatione  dignam.  Ita  est  sane.  Quaecunque  sese  nobis  ingerat  vel  boni,  vel  commodi  species,  quae  nos  vel  latum  unguem  a  patris  nostri  coelestis  obedientia  subducat,  confestim  occurrere  primae  deliberationi  nos  decet:  quod  res  adeo  sancta,  quam  nobis  sanctum  esse  debet  qualecunque  Dei  mandatum,  non  extra  omnem  modo  controversiam,  sed  deliberationem  quoque  posita  sit.  Quum  enim  primum  deliberare  nobis  permittimus,  iam  fines  eo  ipso  transsilimus:  quibus  refractis,  nimirum  procul  evagari,  longiusque  aberrare,  perquam  proclive  est.  Haec  contra  communem  omnium  nostrorum  timiditatem,  non  absque  causa,  antequam  ad  tibi  respondendum  aggrederer,  praefari  libuit:  quod  videam  eius  (ut  ita  dicam)  lippitudine  magis  animos  nostros  impediri,  ne  verum  hac  in  parte  cernant,  quam  alia  quavis  ignoratione.  Ac  longius  fortasse  id  quidem  feci,  quam  res  ferebat  ipsa:  at  certe  brevius  etiam,  quam  huius  postulent  saeculi  mores:  quando  plurimos  hodie  video,  qui  nisi  obiurgatorie  aspereque  ad  sanguinem  paene  usque  vellicentur,  ad  omnem  doctrinam  obsurdescunt.  Iam  istud  quoque  nostri  aeque  ac  saeculorum  omnium  vitium  est,  tam  vafras  esse,  amabiles,  captiosas,  speciosisque  praetextas  nominibus,  ad  illudendum  unumquemque,  carnis  suae  illecebras,  ut  illam  arcere  a  consiliis  nostris,  abigereque,  primus  sit  sapiendi  gradus.  Neque  vero  adeo  ingenio  tuo  diffido,  ut  tantum  in  exhortando  verborum  positurus  fuerim,  si  tui  unius  hic  rationem  ducerem.  Satis  enim  superque  tam  placidae  mansuetaeque  docilitati  fuerit  (quantam  esse  tuam  permultis  iamdudum  argumentis  sum  expertus)  simpliciter  admonitam  ac  edoctam  esse.  Verum  dum  postulatis  tuis  privatim  satisfacere  instituo  :  quia  tamen  eius  generis  res  est,  de  qua  interrogas,  in  qua  et  periculose  et  vulgo  peccatur,  non  frustra,  nec  sine  fructu  aliquo  facturum  me  existimavi,  si  eadem  simul  opera  compluribus  me  docendis  accommodarem,  qui  in  eodem  versantur  errore  :  ut  si  qui  forte  eorum  in  hanc  Epistolam  inciderint  (ego  autem  omnes  incidere  non  modo  facile  patiar,  sed  etiam  vehementer  cupiam)  sibi  quoque  scriptam  putent:  et  siquidem  auscultare  volent,  habeant  quam  sequantur  officii  sui  admonitionem:  sin  minus,  testimonium  saltem  adversum  se  accipiant,  quo  convincantur,  scientes,  prudentes,  ac  etiam  volentes  in  exitium  suum  perrexisse.