1:243  [CO  1.  243]  tutis,  ut  placidam  et  quietam  vitam  degamus,  cum  omni  pietate  ac  honestate. [p. 502]  Neque  hic  se  quisquam  fallat.  Quando  enim  resisti  magistratui  non  potest  quin  simul  Deo  resistatur,  etiam  si  impune  contemni  videtur  posse  inermis  magistratus,  Deus  tamen  armatus  est,  qui  sui  contemptum  fortiter  ulciscatur.  Sub  hac  praeterea  obedientia  moderationem  comprehendo,  quam  sibi  in  publico  imperare  debent  privati  homines,  ne  se  ultro  admisceant  publicis  negotiis,  aut  temere  irrumpant  in  partes  magistratus,  ac  ne  quid  omnino  publice  moliantur.  Si  quid  in  publica  ordinatione  corrigi  intererit,  non  tumultuentur  ipsi,  nec  admoveant  operi  manus,  quas  illis  omnibus  ligatas  esse  hac  in  parte  decet;  ad  magistratus  cognitionem  deferant,  cuius  unius  hic  soluta  est  manus.  Intelligo  autem,  ne  quid  iniussi  audeant.  Nam  ubi  accessit  praefecti  imperium,  iam  ipsi  quoque  publica  autoritate  praediti  sunt.  Ut  enim  aures  atque  oculos  principis  vocare  vulgo  solent  eius  consiliarios,  ita  non  insulse  principis  manus  quis  dicat  quos  rebus  agendis,  mandato  suo  praefecerit.  Quoniam  autem  hactenus  magistratum  descripsimus,  qui  vere  sit  quod  dicitur,  ille  scilicet  patriae  pater,  et,  ut  poeta  loquitur,  pastor  populi,  custos  pacis,  praeses  iustitiae,  innocentiae  vindex,  insanus  merito  iudicandus  sit,  cui  tale  non  probetur  imperium. [p. 503]  At  cum  omnium  prope  saeculorum  hoc  exemplum  sit,  ut  principum  alii,  eorum  omnium  securi  quibus  providendis  intenti  esse  debuerant,  procul  omni  sollicitudine  socordes  delitientur;  alii  ad  rem  suam  attenti,  iura  omnia,  privilegia,  iudicia,  diplomata  venalia  prostituant;  alii  plebeculam  exhauriant  pecunia,  quam  postea  insanis  largitionibus  profundant;  alii  expilandis  domibus,  virginibus  ac  matronis  violandis,  mactandis  insontibus,  mera  latrocinia  exerceant:  eos  vero  pro  principibus  agnoscendos  esse,  quorum  [OS  275]  imperio,  quoad  licet,  parendum  sit,  multis  persuaderi  non  potest.  Siquidem  dum  in  tanta  indignitate  ac  inter  tam  aliena,  non  a  magistratus  modo,  sed  hominis  quoque  officio  facinora,  nullam  speciem  imaginis  Dei  intuentur,  quae  in  magistratu  elucere  debuerat;  dum  nullum  conspiciunt  vestigium  eius  ministri  Dei,  qui  in  laudem  bonis,  malis  in  ultionem  datus  erat;  ita  neque  etiam  praefectum  illum  agnoscunt,  cuius  dignitatem  atque  autoritatem  scriptura  nobis  commendavit.  Et  sane  is  semper  omnium  fere  hominum  animis  ingenitus  fuit  sensus,  non  minore  tyrannos  odio  atque  execratione  insectari,  quam  dilectione  et  veneratione  prosequi  legitimos  reges.  Verum  si  in  Dei  verbum  respicimus,  longius  nos  deducet,  ut  non  eorum [p. 504]  modo  principum  imperio  subditi  simus,  qui  probe  et  qua  debent  fide  munere  suo  defunguntur,  sed  omnium  qui  quoquomodo  rerum  potiuntur,  etiamsi  nihil  minus  praestent,  quam  quod  ex  officio  erat  principum.  Tametsi  enim  summum  suae  beneficentiae