50:242  vel  sannis  omnium  improborum  prostituendam,  quam  si  uno  incendio  tota  una  regio  flagraret.  30.  Sed  quid  dicit  scriptura?  Iam  illa  erat  nonnulla  consolatio,  quod  exemplum  patris  nostri  Isaac  proposuerat:  sed  haec  aliquanto  efficacior,  dum  addit,  hypocritas  cum  sua  iactantia  nihil  aliud  profecturos,  quam  ut  eiiciantur  ex  spirituali  Abrahae  familia:  nobis  vero  nihil  ominus  salvam  fore  haereditatem,  utcunque  insolenter  nos  ad  tempus  lacessant.  Hac  consolatione  sustentent  se  fideles,  quod  non  perpetuo  durabit  Ismaelitarum  tyrannis.  Videntur  quidem  primatum  occupasse:  ideoque  tanquam  abortivos  nos  despiciunt,  primogenitura  sua  inflati  :  sed  tandem  pronuntiabuntur  Agareni,  serva  nati  et  indigni  haereditate.  Locus  pulcherrimus,  ne  turbemur  hypocritarum  fastu:  aut  illorum  sorti  invideamus,  quum  temporariam  cum  dignitate  mansionem  habent  in  ecclesia:  sed  patienter  exitum,  qui  eos  manet,  exspectemus.  Multi  enim  vel  spurii,  vel  alieni  locum  usurpant  in  ecclesia:  sed  fidem  perpetuo  fixam  non  habent.  Quemadmodum  instar  alienigenae,  eiectus  fuit  cum  posteris  suis  Ismael,  qui  tamen  primogenitura  inflatus  initio  regnabat.  Rident  hic  nasuti  quidam  homines  Pauli  simplicitatem,  quod  bilem  foeminae  ex  futili  rixa  natam  comparet  Dei  iudicio:  sed  non  animadvertunt,  interpositum  fuisse  Dei  decretum,  quo  palam  fieret  totum  id  coelesti  providentia  gubernari.  Nam  quod  Abraham  uxori  penitus  morem  gerere  iubetur,  id  certe  extraordinarium  est.  Unde  colligimus,  Deum  Sarae  ministerio  ad  stabiliendam  suam  promissionem  usum  fuisse.  Denique  eiectio  Ismaelis  nihil  aliud  fuit  quam  oraculi  illius  exsequutio  et  effectus:  In  Isaac  vocabitur  tibi  semen:  non  in  Ismaele.  Quamquam  igitur  fuit  ultio  muliebris  rixae,  non  tamen  id  obstat  quominus  per  os  ecclesiae  suae  in  typo  Deus  suum  iudicium  promulgaverit.  31.  Ergo,  fratres.  Nunc  Galatas  hortatur  ut  filii  Sarae  esse  malint  quam  filii  Agar:  imo  iam  in  libertatem  esse  genitos  Christi  gratia  commemorat,  ut  in  sua  conditione  maneant.  Hodie  si  papistas  vocemus  Ismaelitas  et  Agarenos,  iactemus  nos  legitimos  esse  filios:  ridebunt.  At  si  res  cum  re,  causa  cum  causa  conferatur:  nemo  tam  rudis  erit  cui  non  sit  promptum  iudicare.  CAPUT  v.  1.  In  libertate  igitur,  qua  Christus  nos  liberavit^  state:  et  ne  rursum  iugo  servitutis  implicemini.  2.  Ecce,  ego  Paulus  denuntio  vobis  quod,  si  circumcidamini.  Christus  vobis  nihil  proderit.  3.  Testificor  enim  rursum  cuivis  homini  qui  circumciditur,  quod  debitor  sit  totius  legis  faciendae.  4.  Exinaniti  estis  a  Christo  quicunque  per  legem  iustificamini,  a  gratia  excidistis.  16