47:242  Mosis  sedebant,  ita  hoc  honoris  evangelio  nos  habere  convenit,  ne  eius  ministros  licet  minus  probos  fastidiamus.  Quoniam  autem  minima  quaeque  offendicula  insipidum  nobis  evangelium  reddunt,  ne  tales  delitiae  nos  impediant,  semper  nobis  in  mentem  veniat  quod  prius  attigi:  si  non  ita  potenter  in  ministris  viget  Christi  spiritus,  ut  palam  in  illis  pastorem  se  exhibeat,  nos  vitiorum  nostrorum  poenas  dare,  et  interea  obedientiam  nostram  probari.  12.  Mercenarius  autem  et  qui  pastor  non  est  Tametsi  pastoris  nomen  Christus  uni  sibi  vindicat,  tacite  tamen  innuit,  organis  suis  in  quibus  agit  aliquo  modo  commune  esse.  Scimus  enim  quam  multi  post  Christum  sanguinem  pro  salute  ecclesiae  fundere  non  dubitaverint,  nec  prophetae  ante  eius  adventum  vitae  suae  pepercerant.  Sed  in  sua  persona  absolutum  exemplar  proponit,  ut  ministris  suis  legulam  praescribat.  Quam  enim  foeda  et  pudenda  est  nostra  segnities,  si  nobis  vita  nostra  pretiosior  est  ecclesiae  salute,  cui  suam  Christus  posthabuit?  Caeterum  quod  de  tradenda  pro  ovibus  vita  hic  dicitur,  tanquam  certum  et  praecipuum  paterni  affectus  signum  est.  Voluit  primo  Christus  testatum  relinquere,  quam  singulare  amoris  erga  nos  sui  specimen  in  morte  sua  ediderit:  deinde  ad  imitationem  exempli  sui  provocare  suos  omnes  ministros.  Differentia  tamen  inter  hos  et  illum  notanda,  quod  vitam  suam  impendit  in  satisfactionis  pretium,  sanguinem  suum  effudit  ad  purgandas  animas  nostras,  corpus  suum  in  victimam  expiatricem  obtulit  qua  patrem  nobis  placaret.  In  evangelii  autem  ministris  nihil  tale  esse  potest,  qui  omnes  purgatione  indigent,  et  unico  illo  sacrificio  expiantur  et  Deo  reconciliantur.  Sed  hic  non  disputat  Christus  de  mortis  suae  efficacia  aut  fructu  ut  se  aliis  comparet,  sed  ut  probet  qualiter  erga  nos  affectus  fuerit:  deinde  ut  alios  invitet  ad  sequendum  suum  exemplum.  In  summa,  sicut  proprium  Christi  fuit  vitam  nobis  sua  morte  acquirere,  et  praestare  quidquid  evangelium  continet,  ita  commune  pastorum  omnium  officium  est,  doctrinam  quam  annuntiant  vitae  suae  dispendio  tueri,  et  evangelii  doctrinam  sanguine  suo  obsignando  testari  quam  non  frustra  doceant  salutem  sibi  et  aliis  a  Christo  partam  esse.  Hic  tamen  moveri  potest  quaestio,  numquid  mercenarius  habendus  sit,  qui  luporum  occursum  quamlibet  ob  causam  declinat.  Haec  quaestio  olim  quasi  in  re  praesenti  agitata  fuit,  quum  tyranni  in  ecclesiam  crudeliter  saevirent.  Tertullianus  et  similes  nimis  meo  iudicio  in  hac  parte  fuerunt  austeri.  Augustini  moderatio  longe  melior,  qui  ita  pastoribus  fugere  permittit,  si  publicae  saluti  sua  fuga  magis  consulant  quam  gregem  sibi  commissum  deserendo  prodant.  Hoc  autem  fieri  indicat,  quum  ecclesia  non  destituitur  idoneis  ministris,  et  pastoris  vita  sic  privatim  impetitur  ab  hostibus,  ut  sua  absentia  16