41:242  imposita  minuerit,  quod  tamen  historici  falsum  esse  produnt.  Nam  damnant  ipsius  avaritiam  et  rapacitatem.  Aliis  in  rebus  excellentior  fuit  fratre  Antiocho:  tamen  crudelis  fuit  erga  suos,  deinde  homo  libidinosus.  Quum  magnos  sumptus  faceret,  non  potuit  ita  esse  temperans  ut  parceret  suis  subditis.  Nam  luxuria  et  prodigalitas  trahunt  semper  secum  saevitiam  in  exigendis  tributis.  Qui  enim  multum  profundit,  necesse  est  ut  exsugat  fere  populi  sanguinem.  Quum  ergo  Seleucus  fuerit  libidinosus  homo,  commodior  est  atque  aptior  hic  sensus,  quod  fecerit  transire  exactorem,  hoc  est,  quod  gravaverit  totam  suam  ditionem  magnis  et  novis  exactionibus.  Hoc  tantum  de  ipso  dicitur,  quoniam  statim  interfectus  est,  quemadmodum  sequitur  in  secunda  parte  versus.  Si  placeat  appositive  legere  decorem  regni,  laudabitur  Seleucus,  ac  si  dictum  esset,  qui  decus  erit  ac  ornamentum.  Sed  ego  existimo  subaudiendam  esse  literam  b.  Stabit  ergo  in  locum  eius  transire  faciens  exactorem,  et  paucis  diebus  conteretur.  Significat  hoc  verbo  cruentam  mortem.  Neque  enim,  inquit,  in  ira.  Miror  cur  quidam  vertit  in  conspectu  mutuo,  Appaiim  enim  accipiunt  Hebraei  pro  iracundia,  quasi  diceret,  non  conteretur  aperto  marte,  nec  proelio  commisso,  sed  interficietur  a  suis  domesticis.  Variant  autem  in  specie  mortis  historici,  quoniam  nonnulli  scribunt  veneno  fuisse  necatum,  alii  autem  fuisse  occisum  gladio.  Sed  hoc  parum  ad  rem  refert.  Nunc  sequitur  successio  Antiochi  Epiphanis.  21.  Et  stabit  super  locum  eius  probrosus,  et  non  dabunt  ei  (non  constituent  super  eum)  decorem  regni  (hoc  est,  non  deferent  gloriam  regni)  et  veniet  cum  pace,  et  apprehendet  regnum  per  blanditias.  Consentiunt  in  hoc  scriptores,  Antiochum  Epiphanem  fuisse  admodum  versuto  ingenio:  et  quidam  etiam  volunt  furtim  Roma  egressum.  Probabilis  tamen  coniectura  est,  fuisse  dimissum  a  Romanis,  audita  patris  morte,  quia  contenti  erant  fratre  eius  Demetrio,  praesertim  quum  haberent  ex  maximis  regni  proceribus  etiam  alios  obsides,  sed  ille  erat  unus  ex  tribus  filiis  regis.  Quidquid  sit,  de  vafritie  huius  hominis  satis  convenit  inter  omnes.  Interea  tamen  fuit  saevus  et  atrox,  et  ideo  Polybius  dicit  vocatum  fuisse  Epimanem  per  ludibrium.  Quum  ergo  sumpsisset  sibi  cognomen  illustris,  vocatus  fuit  Vesanus,  ob  turbulentum  ingenium.  Sed  erat  monstrum  conflatum  ex  diversis  vitiis.  Nam  erat  servili  et  adulatorio  ingenio,  et  studuerat  etiam  Romae  sibi  favorem  acquirere  illo  artificio,  quemadmodum  postea  videbimus.  Ubi  autem  extra  metum  erat,  nullus  modus  eius  crudelitati,  atque  etiam  ferociae.  Hac  ratione  vocatur  hic  despectus.  Nam  Romae  certe  habitus  fuit  in  pretio,  deinde  exceptus  fuit  cum  summo  plausu  a  magna  parte  populi.  16