30:242  esse  scripturae  sacrae  vocem,  et  non  inanem  titulum,  quum  Deus  exercituum  nominatur,  et  non  temere  a  Davide  prolatam  istam  esse  sententiam,  bellum  esse  Domini.  Quare  ne  dubitemus  quin  Deus  auxilium  ferat  nobis  opportuno  tempore,  non  tantum  adversus  Groliathum  quempiam,  sed  etiam  speremus  eum  quidquid  nobis  adversabitur  debellaturum  et  destructurum,  etsi  potentia  invicta  videatur.  Quemadmodum  hic  videmus  Philistaeos  numerosissimum  exercitum  habuisse,  et  omnibus  ad  bellum  necessariis  instructissimos  fuisse:  quin  etiam  saepe  de  populo  iudaico  victoriam  antea  reportasse,  et  tamen  momento  factos  debiliores,  et  caesos  fugatosque,  ac  magna  internecione  deletos  fuisse.  David  ergo  sententiam  illam  protulit,  non  tantum  ad  praesens  bellum,  sed  etiam  ad  universam  omnium  saeculorum  ecclesiam  pertinentem.  Sic  solet  Deus  eos  qui  iam  morti  erant  destinati,  et  quos  undique  pavor  circumdabat,  liberare,  et  tempestates  omnes  adversus  suos  coortas  sedare  et  dissipare:  quo  fiat  eius  potentia  et  virtus  nobis  conspectior,  qua  freti  non  dubitemus  quin  omnes  adversum  nos  insurgentes  hostes  compescat,  eorumque  consilia  et  conatus  frangat.  Ac  licet  illi  solo  adspectu  nos  antea  propter  infinitam  multitudinem  et  vires  terrerent,  et  ipsis  resistendi  nullae  vires  esse  nobis  viderentur,  ne  tamen  animum  despondeamus,  neque  pavore  deficiamus  :  sed  potius  novas  in  Domino  vires  accipiamus:  certo  persuasi  Deum  nobis  adfuturum,  et  in  angustiis  opportuno  tempore  auxilium  daturum,  et  non  solum  quae  ad  hanc  vitam  spectant,  sed  etiam  quae  ad  aeternam  salutem,  praestiturum  :  hostium  denique  vires  fracturum,  et  victoriam  de  ipsis  daturum.  Ac  proinde  licet  ipse  diabolus  adversum  nos  caput  cum  suis  satellitibus  efferat,  fore  tamen  ut  eum  Deus  conterat,  et  in  ipsam  inferorum  abyssum  detrudat.  Fractis  vero  nostrorum  hostium  viribus,  meminerimus  deberi  a  nobis  gratiarum  actionem  Deo,  quod  ad  nos  conservandos  hostium  capita  fregerit,  et  magna  internecione  deleverit.  Contra  vero  nisi  Deo  exhibeamus  illum  honorem,  ut  fiduciam  in  illo  nostrae  salutis  eius  freti  promissionibus  collocemus,  profecto  nihil  repetitae  preces  nos  iuverint,  quandoquidem  externo  potius  ritu  quam  animo  sincero  illum  invocaverimus:  ubi  enim  est  diffidentia,  ibi  non  est  sincerus  cultus,  et  potius  Deus  irritatur  quam  advocatur.  Unde  igitur  plerumque  accidit,  ut  non  solum  omnibus  humanis  praesidiis  destituamur,  sed  etiam  Deum  ipsum  pro  auxiliatore  adversarium  habeamus,  et  nos  in  hostium  manus  tradat,  nisi  quod  diffidentia  nos  dubios  et  animi  fluctuantes  facit,  et  pro  veris  precibus  inanes  tantum  demurmurationes  profert,  quibus  divinae  bonitatis  contemptores  deprehendantur?  Vera  autem  fides  eam  in  nobis  audaciam  generat  verbo  Dei  in  nobis  genitam,  quae  16