27:242  c'est  son  propre  office,  et  qu'il  en  est  le  maistre:  mais  il  luy  donne  aussi  une  telle  efficace  d'erreur,  c'est  a  dire,  une  telle  vertu,  que  les  hommes  sont  aveuglez  tant  et  plus.  Voila  donc  ce  que  nous  avons  a  noter.  Et  pourtant  nous  sommes  admonnestez  en  somme  de  prier  Dieu  qu'il  nous  donne  esprit  de  prudence  et  discretion,  afin  que  nous  ne  soyons  point  entortillez  parmi  les  mensonges  de  Satan,  quelque  couleur,  quelque  couverture,  et  fallace  qu'il  y  ait.  Voila  pour  un  item,  que  les  hommes  se  doivent  bien  garder  de  presomption.  Car  ils  ne  sont  point  tant  habiles  de  pouvoir  iuger  comme  il  appartient.  Mais  recourons  a  Dieu,  et  il  nous  fera  cognoistre  le  blanc  et  le  noir.  Et  puis  au  contraire  cognoissons,  quand  on  nous  promet  du  bien,  qu'on  nous  menace  de  quelque  mal,  qu'il  faut  que  nous  ayons  la  doctrine  pour  fondement,  et  que  nous  sentions  que  Dieu  ne  veut  point  separer  sa  benediction,  et  sa  grace  d'avec  sa  Loy.  Et  ainsi  quand  nous  l'avons  offense,  que  c'est  en  vain  que  nous  esperons  qu'il  nous  sera  favorable.  Car  puis  que  nous  avons  provoque  son  ire,  nous  sentirons  qu'il  ne  menace  point  en  vain:  quand  il  a  parle  en  sa  Loy  qu'il  persecutera  tout  ceux  qui  luy  sont  contraires:  qu'il  faut  que  cela  s'accomplisse.  Adioustons  donc  ce  fondement  de  foy,  et  de  repentance:  et  alors  nous  ne  serons  point  trompez,  quant  a  ces  propheties  particulieres,  que  tousiours  ceste  reigle  demeurera  vraye,  c'est  assavoir  que  ceux  qui  parlent  en  verite,  ils  sont  envoyez  de  Dieu.  Mais  cependant  Satan  ne  laissera  point  d'avoir  conge  en  une  espece  d'abuser  les  incredules,  comme  ils  en  sont  dignes  :  mais  ceste  verite-la  n'est  point  verite,  comme  S.  Paul  dit,  que  ce  sont  miracles  de  tromperies  pour  ceux  qui  s'y  fient,  et  que  cela  ne  tend  qu'a  seduire  le  povre  monde  :  voila  aussi  comme  nostre  Seigneur  Iesus  en  a  parle.  Et  ainsi  notons  bien,  que  combien  que  les  seducteurs  ayent  quelque  apparence  de  verite  en  quelque  faict  particulier,  tout  cela  n'est  rien:  car  il  n'y  a  nulle  teneure:  et  tant  s'en  faut  qu'il  y  ait  la  nulle  verite,  qu'on  voit  bien  que  ce  n'est  que  vanite  et  mensonge,  pour  abuser  les  povres  incredules  qui  se  sont  destournez  de  Dieu.  Voila  donc  en  somme  ce  que  nous  avons  a  noter  de  ce  passage.  Quoy  qu'il  en  soit,  quand  nous  prattiquerons  ce  qui  est  ici  dit  par  Moyse,  de  suyvre  ce  Seigneur,  de  cheminer  en  la  voye  qu'il  nous  monstre:  nous  n'avons  point  a  craindre,  estans  hors  de  dangers,  et  de  toutes  les  astuces  de  nostre  ennemi.  Combien  que  le  diable  soit  pere  de  mensonge,  et  qu'il  nous  forge  une  infinite  d'illusions,  combien  que  de  nostre  coste  nous  soyons  rudement  assaillis  par  luy:  tant  y  a  que  Dieu  nous  preservera,  moyennant  que  nous  demeurions  tousiours  en  ceste  obeissance  de  sa  parolle,  et  que  nous  demandions  de  l'escouter  en  tout  et  par  tout.  Or  16