1:241  [CO  1.  241]  Minime  id  vero,  siquidem  magistratus  vindicta  non  hominis,  sed  Dei  esse,  cogitanda  est,  quam  per  hominis  ministerium  nobis,  ut  ait  Paulus  (Rom.  13),  largitur.  Nihilo  etiam  magis  cum  Christi  verbis  pugnamus,  quibus  resistere  malo  prohibet  et  dexteram  maxillam  obvertere  praecipit  ei,  qui  alapam  in  sinistram  impegerit,  permittereque  ei  pallium,  qui  tunicam  auferat  (Matth.  5).  Vult  quidem  illic  suorum  animos  a  retaliandi  cupidine  tantopere  abhorrere,  ut  citius  duplicari  in  se  iniuriam  laturi  sint,  quam  ad  rependendam  animos  adiecturi;  a  qua  patientia  nec  ipsi [p. 498]  eos  abducimus.  Vere  enim  Christianos,  esse  oportet  hominum  genus  ad  contumelias  iniuriasque  ferendas  natum,  pessimorum  hominum  nequitiae,  imposturis,  ludibriis  expositum;  neque  id  modo,  sed  eorum  omnium  malorum  tolerantes  esse  oportet,  hoc  est,  sic  totis  animis  compositos,  ut  suscepta  una  afflictione  ad  alteram  se  comparent,  nihil  sibi  in  totam  vitam  promittentes,  quam  perpetuae  crucis  tolerantiam.  Interim  et  iis,  qui  sibi  iniurii  sunt,  benefaciant  et  maledicentibus  bene  precentur,  et,  quae  unica  est  sua  victoria,  bono  malum  vincere  contendant  (Rom.  12).  Sic  affecti,  non  quaerent  oculum  pro  oculo,  dentem  pro  dente,  qualiter  suos  discipulos  instituebant  Pharisaei  ad  expetendam  ultionem,  sed,  quomodo  a  Christo  erudiuntur,  et  corpus  suum  mutilari,  et  malitiose  sua  sibi  eripi  sic  ferent,  ut  eas  iniurias,  simul  ac  irrogatae  sibi  fuerint,  remissuri  sint,  ac  ultro  condonaturi.  Neque  istaec  tamen  animorum  aequitas  et  moderatio  impediet,  quin  integra  in  suos  inimicos  amicitia,  magistratus  ope  ad  rerum  suarum  conservationem  utantur,  aut  publici  boni  studio  sontem  ac  pestilentem  hominem  ad  poenam  postulent,  quem  emendari,  nisi  morte,  non  posse  noverint.  Quod  autem  obiectari  solet,  lites  a  Paulo  in  universum  esse  damnatas  (1  Cor.  6),  id  quoque  falsum [p. 499]  est.  Intelligi  ex  eius  verbis  facile  potest,  immodicum  fuisse  litigandi  furorem  in  Corinthiorum  ecclesia,  usque  eo,  ut  Christi  evangelium  et  totam  suam  religionem  impiorum  cavillis  ac  maledicentiae  exponerent.  Id  primum  reprehendit  in  illis  Paulus,  quod  evangelium  apud  infideles,  dissensionum  suarum  intemperie,  traducerent;  deinde  et  hoc  ipsum,  quod  eum  in  modum  inter  se  dissiderent,  fratres  cum  fratribus.  [OS  273]  Tam  enim  procul  a  ferenda  iniuria  alieni  erant,  ut  alii  aliorum  fortunis  avide  inhiarent,  ultro  lacesserent  et  damnum  inferrent.  In  illam  ergo  litigandi  insaniam  invehitur,  non  simpliciter  in  quasvis  controversias.  At  omnino  delictum  esse  pronunciat,  quod  non  potius  damnum  acciperent  rerum  suarum,  quod  pro  his  conservandis  ad  contentiones  usque  laborarent.  Id  sane  Christianis  agendum  est,  ut  de  suo  iure  decedere  semper  malint,  quam  in  forum  progredi,  unde  vix  exire  possint,  nisi  commotiore  animo  et  in  fratris  odium  Calvini  opera.  Vol  I.