55:240  gens  sancta,  populus  in  acquisitionem,  ut  virtutes  enarretis  eius  qui  vos  ex  tenebris  vocavit  in  admirabile  lumen  suum.  10.  Qui  aliquando  non  populus,  nunc  autem  populus  Dei:  qui  non  consequuti  eratis  misericordiam,  nunc  misericordiam  consequuti  estis.  9.  Vos  genus  electum.  Iterum  eos  ab  incredulis  separat,  ne  eorum  exemplo  in  transversum  acti  (ut  plerumque  fieri  solet)  a  recta  fide  deficiant.  Quoniam  ergo  absurdum  est  ut  se  impiorum  societate  involvant  quos  Deus  a  mundo  segregavit,  fideles  hic  Petrus  admonet  in  quantum  honorem  evecti  fuerint:  deinde  quorsum  et  ad  quid  vocati.  Porro  iisdem  elogiis,  quae  in  eos  confert,  veterem  populum  ornabat  Moses:  sed  docere  vult,  ipsos  Christi  beneficio  tantam  dignationem,  a  qua  exciderant,  de  integro  recuperasse.  Quamquam  simul  verum  est,  terrenum  duntaxat  bonorum  istorum  gustum  praebuisse  Deum  patribus,  solidam  exhibitionem  in  Christo  constare.  Perinde  igitur  valet  haec  sententia,  ac  si  dixisset,  patres  vestros  olim  Moses  gentem  sanctam,  regnum  sacerdotale,  et  Dei  peculium  vocabat:  nunc  maiori  iure  in  vos  competunt  isti  omnes  tituli:  quare  videndum  est  ne  vos  illis  spoliet  vestra  incredulitas.  Interea  tamen  quia  maior  pars  gentis  incredula  erat,  Iudaeos  fideles  apostolus  reliquis  omnibus  tacite  opponit,  tametsi  numero  praevalebant:  ac  si  diceret,  eos  demum  genuinos  esse  filios  Abrahae,  qui  in  Christum  credunt:  eosque  solos  possessionem  retinere  bonorum  omnium,  quae  Deus  singulari  quodam  privilegio  in  totam  gentem  contulerat.  Genus  electum  vocat,  quod  sibi  Deus,  praeteritis  aliis,  tanquam  maxime  eximium  adoptavit:  gentem  sanctam,  quam  dicavit  sibi  et  destinavit  in  puritatem  vitae  ac  sanctimoniam:  populum  in  acquisitionem,  ut  illi  sit  quasi  peculium  et  haereditas.  Sic  enim  simpliciter  accipio,  quod  Dominus  nos  vocavit,  ut  tanquam  vere  suos  et  sibi  addictos  possideat.  Quem  sensum  comprobant  verba  Mosis:  si  custodieritis  pactum  meum,  eritis  mihi  in  thesaurum  peculiarem  prae  cunctis  populis.  In  sacerdotio  regali  elegans  est  verborum  Mosis  inversio.  Is  enim  dicit  regnum  sacerdotale:  quod  idem  valet  Itaque  hoc  vult  Petrus,  patres  vestros  Moses  vocabat  sacrum  regnum,  quia  totus  populus  quasi  regia  libertate  praeditus  erat,  et  ex  eius  corpore  electi  erant  sacerdotes.  Proinde  utraque  dignitas  simul  permista  erat  Nunc  vos  estis  sacerdotes  regii,  et  quidem  praestantiore  modo:  quia  singuli  in  Christo  consecrati  estis,  ut  sitis  et  regni  socii,  et  sacerdotii  participes.  Tametsi  ergo  aliquid  vobiscum  simile  habuerint  patres,  illis  tamen  longe  praestatis.  Caeterum  postquam  diruta  est  a  Christo  maceria,  ex  quacunque  simus  gente,  his  omnibus  titulis  nos  Dominus  insignit,  dum  nos  populo  suo  accenset.  Porro  in  his  omnibus  bene-