50:240  et  perveniant  ad  virilem  usque  aetatem.  Praeclarum  certe  ecclesiae  encomium  et  in  primis  honorificum.  Sed  inepti  sunt  papistae  et  bis  pueri,  qui  illud  obtendunt  ad  nos  gravandos.  Nam  quum  matrem  habeant  adulteram,  quae  diabolo  filios  in  mortem  gignit,  quam  absurdum  est  postulare  ut  filii  Dei  illi  se  crudeliter  necandos  dedant?  Quanto  honestiore  praetextu  Ierosolymitana  synagoga  superbire  tunc  poterat,  quam  hodie  Romana?  Videmus  tamen  ut  Paulus  eam  omni  exutam  ornatu  in  sortem  Agar  reiiciat.  27.  Scriptum  est  enim:  Exsulta  sterilis,  quae  non  paris,  erumpe  et  clama,  quae  non  parturis:  quia  plures  erunt  liberi  desertae,  quam  habentis  maritum.  28.  Nos  autem1  fratres,  secundum  Isaac  promissionis  sumus  filii.  29.  Sed  quemadmodum  tunc  qui  secundum  carnem  erat  genitus,  persequebatur  eum  qui  secundum  spiritum  genitus  erat:  sic  et  nunc.  30.  Sed  quid  dicit  scriptura?  Eiice  ancillam  et  filium  eius.  Non  enim  haereditatem  obtinebit  filius  ancillae  cum  filio  liberae.  31.  Ergo,  fratres,  non  sumus  ancillae  filii,  sed  liberae.  27.  Scriptum  est.  Probat  Iesaiae  testimonio,  nasci  legitimos  ex  ecclesia  filios  secundum  promissionem.  Locus  est  in  cap.  54,  3,  ubi  propheta  et  de  regno  Christi  et  de  gentium  vocatione  agit.  Promittit  autem  et  sterili  et  viduae  numerosam  sobolem.  Haec  enim  laetitiae  et  exsultationis,  ad  quam  ecclesiam  hortatur,  causa  est.  Notandum  autem  consilium  apostoli  huc  tendere,  ut  istam  spiritualem  Ierusalem,  de  qua  Iesaias  vaticinatur,  adimat  Iudaeis  :  utpote  cui  filios  undique  ex  cunctis  gentibus  congregatum  iri  denuntiat  propheta:  neque  id  ulla  sua  praeparatione,  sed  benedictione  Dei  gratuita.  Itaque  mox  concludit  filios  Dei  nos  promissione  fieri,  exemplo  Isaac  :  nec  alia  ratione  consequi  hunc  honorem.  Haec  conclusio  imperitis  et  minus  in  scriptura  exercitatis  infirma  videtur  esse:  quia  principium  non  tenent,  quod  tamen  certissimum  est,  promissiones  omnes  in  Messia  fundatas,  esse  gratuitas.  Id  pro  confesso  quia  sumebat  apostolus,  ideo  tam  secure  promissionem  legi  opposuit.  29.  Quemadmodum  tunc  qui  secundum  carnem.  Hic  pseudoapostolorum  ferociam  refutat,  qui  proterve  insultabant  piis  omnia  reponentibus  in  Christo.  Hos  enim  turbabat  eiusmodi  ferocia,  ideoque  opus  habebant  consolatione,  sicut  illos  severius  reprimi  operae  pretium  erat.  Admonet  ergo,  non  esse  mirum  si  faciant  hodie  filii  legis  quod  fecit  initio  pater  ipsorum  Ismael,  qui  verum  haeredem  Isaac  vexavit,  primogenitura  sua  fretus.  Eodem  nunc  supercilio  posteros  propter  externas  caeremonias,  circumcisionem  totumque  legis  apparatum  superbire  adversus  legitimos  Dei  filios  molestiamque  his  facessere.  S  p  i  r  i  t  um