47:240  nam  magna  pars  eorum,  qui  se  Christi  discipulos  iactant,  proterve  adversus  eum  recalcitrat.  Postremo,  quod  simul  atque  vox  aliqua  extranei  personuit  huc  illuc  instabiles  rapimur,  haec  inconstantia  et  levitas  satis  prodit,  quam  male  adhuc  in  fide  profecerimus.  Quod  si  minor  est  credentium  numerus  quam  optandum  sit,  deinde  si  multi  ex  paucis  subinde  diffluunt,  habent  pii  doctores  consolationem  qua  se  sustineant,  quod  ab  electis  Dei  audiuntur,  qui  Christi  oves  sunt.  Nostrum  quidem  est  sedulo  dare  operam,  et  modis  omnibus  satagere  ut  in  fidei  unitatem,  si  fieri  possit,  totus  mundus  coalescat:  interim  nostro  numero  contenti  simus.  9.  Ter  me  si  quis  ingrediatur.  Eximia  piorum  consolatio,  quod  ubi  semel  Christum  amplexi  fuerint,  extra  periculum  se  esse  audiunt.  Nam  salutem  illis  et  prosperum  statum  Christus  promittit.  Deinde  partes  duas  exprimit,  quod  tuto  quocunque  opus  fuerit  incedent,  deinde  quod  ad  satietatem  usque  pascentur.  Per  ingressum  et  exitum  scriptura  saepe  omnes  vitae  actiones  significat,  sicuti  gallice  dicimus  aller  et  venir  pro  versari.  Duplex  ergo  evangelii  utilitas  nobis  commendatur  his  verbis,  quod  in  eo  pabulum  animae  nostrae  reperient,  quae  alioqui  famelicae  languent,  nec  nisi  vento  pascuntur:  deinde  quod  nobis  fidelis  custodia  et  propugnaculum  erit  adversus  luporum  et  latronum  incursus.  10  Fur  non  venit.  Hoc  dicto  Christus  quasi  aurem  nobis  vellicat,  ne  torpentes  et  incautos  ministri  Satanae  nos  circumveniant.  Facit  enim  nimia  nostra  securitas  ut  undique  nudi  falsis  doctrinis  pateamus.  Unde  enim  tanta  credulitas  ut,  qui  in  Christo  fixi  quiescere  debebant,  per  multos  errores  circumvolitent,  nisi  quia  a  tot  falsis  doctoribus  non  satis  sibi  metuunt  nec  cavent?  Huc  accedit  quod  inexplebilis  nostra  curiositas  novis  et  extraneis  hominum  figmentis  sic  delectatur,  ut  sponte  insano  cursu  ad  fures  et  lupos  ruamus.  Non  abs  re  itaque  Christus  falsos  doctores,  quamlibet  blande  se  insinuent,  letale  semper  venenum  afferre  testatur,  quo  magis  ad  eos  arcendos  intenti  simus.  Similis  est  Pauli  admonitio  ad  Coloss.  2,  8:  Videte  ne  quis  vos  praedetur  per  inanem  philosophiam,  ete.  Ego  veni.  Altera  similitudo:  nam  quum  hactenus  Christus  ianuam  se  vocaverit,  et  veros  pastores  qui  ad  hanc  ianuam  oves  congregant,  nunc  pastoris  induit  personam,  et  quidem  se  unicum  esse  pastorem  praedicat,  ut  certe  in  neminem  alium  proprie  hic  honor  et  titulus  competit.  Quotquot  enim  fidi  sunt  ecclesiae  pastores,  quia  eos  ipse  excitat,  necessariis  dotibus  instruit,  gubernat  suo  spiritu,  in  illis  operatur,  non  faciunt  quominus  ipse  solus  ecclesiae  suae  praesit  et  solus  pastor  emineat.  Tametsi  enim  eorum  utitur  ministerio,  pastoris  tamen  munus  sua  virtute  obire  et  exsequi  non  desinit:  ita  etiam  magistri  sunt  et  doctores,  ut  eius  magisterio  non  derogent.  Denique