30:240  periri  volumus,  necessario  nobis  ad  ipsius  bonitatem  certa  fiducia  confugiendum  est,  ut  experiamur  quod  alio  loco  propheta  praedicat:  Ecce  reges  convenerunt^  progressi  sunt  pariter  ;  ipsi  viderunt^  similiter  admirati  sunt,  conturbati  sunt,  commoti  sunt,  tremor  apprehendit  eos,  dolor  ut  parturientis.  Quibus  verbis  propheta  consolatur  ecclesiam,  docetque  coniurantibus  adversus  ipsam  capitalissimis  hostibus,  saevissimis  et  fortissimis,  a  quibus  iamiam  laniandi  videantur,  fore  ut  quum  impetum  facere  volent,  in  furorem  vertantur,  et  miseros  licet  ac  inermes  conspicati,  non  audeant  tamen  invadere,  sed  ultra  progrediantur,  et  temere  viarum  ignari  abitum  accelerent,  Deo  ipsos  persequente,  et  consilia  ipsorum  frangente.  Profecto  talis  hostium  fuga  et  interitus  longe  insignior  est  quam  si  mille  propugnaculis  et  praesidiis  humanis  tegerentur.  Idcirco  David  merito  dicit  hoc  loco,  Dei  esse  bellum  :  quanquam  quidam  propter  unicam  literam  ad  illud  bellum  restringant,  quasi  David  dicat,  Deum  esse  populi  israelitici  caput,  et  ex  periculo  imminenti  ipsum  servaturum,  qua  ratione  volet:  quod  sane  verissimum  est:  verum  tamen  etiam  generalis  est  sententia:  qua  non  dubium  est  quin  David  docere  voluerit,  Deum  omnibus  praeliis  praeesse,  et  cui  voluerit  victoriam  concedere.  Quod  ipsum  ethnici  cognoverunt:  et  ideo  in  bellum  profecturi  diis  suis  sacra  facere  soliti,  ut  bene  sua  consilia  verterent  et  fortunarent.  Et  post  partam  victoriam  templa  fuerunt  ad  gratiarum  actionem  aperta.  Sed  quae  illi  diis  suis  sacra  fecerant,  mera  hypocrisis  fuit,  quod  verum  Deum  non  nossent,  et  quae  diis  suis  offerebant  in  Dei  viventis  contumeliam  redundarent.  Sed  Deus  in  hominum  mentibus  reliquas  esse  voluit  aliquas  religionis  scintillas,  ad  maiorem  ipsorum  condemnationem,  et  ut  sint  coram  Deo  inexcusabiles:  quod  ultro  sibi  oculos  effodiant,  ne  ad  Deum  vocantem  veniant  et  assurgant.  Idcirco  ethnici  fortunam  bellis  praeesse  et  dominari  dixerunt:  deinde  Martem  deum  praeliorum  imaginati  sunt:  Dei  viventis  interea  non  recordati.  Quod  et  ipsum  prophetae  Dei  populo  saepe  exprobrarunt,  dicentes  illos,  suo  reti  et  industriae  sacrificavisse.  Quemadmodum  hodie  multos  principes  videas  veram  cognitionem  Dei  non  habentes,  parta  victoria,  et  in  patriam  reduces  trophaea  ponere,  et  supplicationes  decernere,  subinde  suum  illud  Kyrie  eleison  repetentes  :  sed  interim  suas  laudes  praedicare,  virtutem  et  industriam  magni  facere:  fortunamque  dominam  laudare,  Deique  memoriam  omnem  abolere.  David  itaque  paucis  istis  verbis  docet,  bella  esse  Domini;  quasi  dicat  illum  dominum  esse  bellorum  et  in  omnes  dominari  et  autoritatem  habere;  ut  qui  de  suis  viribus  multum  sibi  pollicebantur,  animum  repente  despondeant,  et  ab  iis  qui  imbelles  et  ignavi  habebantur,  contra  omnium  opinionem  superentur.