1:240  [CO  1.  240]  ille  vero  indigne,  sive  in  capite,  sive  in  fortunis  oppressus,  in  magistratus  fidem  se  conferat,  querimoniam  exponat,  quod  aequum  est  ac  bonum  postulet,  sed  omni  procul  nocendi  vindicandive  libidine,  procul  asperitate  et  odio,  procul  contentionis  ardore;  quin  potius  paratus  suo  cedere  et  quidvis  perpeti,  quam  inimico  in  adversarium  animo  ferri.  Contra,  ubi  animi  malevolentia  suffusi,  corrupti  invidia,  iracundia  incensi,  ultionem  spirantes,  aut  sic  denique  ardore  certaminis  inflammati,  ut  de  caritate  aliquid  remittant,  tota  etiam  iustissimae  causae  actio  non  impia  esse  non  potest.  Nam  hoc  constitutum  esse  axioma  Christianis  omnibus  convenit:  nunquam,  quantumvis  aequam  litem  iuste  tractari  a  quovis  posse,  nisi  pari  adversarium [p. 496]  dilectione  benevolentiaque  prosequatur,  ac  si  iam  amice,  quod  controvertitur  negotium,  transactum  ac  compositum  esset.  Iniecerit  forte  aliquis,  talem  moderationem  adeo  nunquam  in  iudicium  afferri,  ut  instar  sit  prodigii  futura,  si  qua  reperta  fuerit.  Fateor  sane,  ut  sunt  horum  temporum  mores,  rarum  extare  probi  litigatoris  exemplum,  sed  res  tamen  ipsa,  nullius  mali  accessione  inquinata,  bona  esse  et  pura  non  desinit.  Caeterum,  cum  sanctum  esse  Dei  donum  audimus  auxilium  magistratus,  eo  diligentius  cavendum  est,  ne  nostro  vitio  polluatur.  Qui  vero  iudiciarias  omnes  disceptationes  praecise  damnant,  intelligant  se  sanctam  Dei  ordinationem  simul  repudiare,  et  donum,  ex  eorum  genere,  quae  mundis  munda  esse  possint;  nisi  forte  Paulum  flagitii  insimulare  volent,  qui  et  accusatorum  calumnias,  eorum  quoque  vafritiem  et  malitiam  exponendo  a  se  depulit,  et  romanae  civitatis  praerogativam  sibi  in  iudiciis  asseruit,  et  ab  iniquo  praeside  ad  Caesaris  tribunal,  cum  opus  fuit,  provocavit  (Act.  22  et  24.  25).  Nec  obest,  quod  Christianis  omnibus  interdicta  est  vindictae  cupiditas,  quam  et  nos  a  christianis  subselliis  longissime  abigimus  (Deut.  32.  Matth.  5.  Rom.  12).  Nam,  sive  civiliter  contenditur,  non  recta  incedit  via,  nisi  qui  innoxia  simplicitate  rem  suam  iudici,  tanquam  publico  tutori  commendat;  nihil  minus,  quam  mutuam [p. 497]  mali  vicem,  qui  est  vindictae  affectus,  rependere  cogitans.  Sive  capitalis  aut  gravior  aliqua  intenditur  actio,  eum  accusatorem  requirimus,  qui  nullo  ulciscendi  aestu  correptus,  nulla  privatae  iniuriae  offensione  tactus  in  forum  accedat;  sed  in  animo  duntaxat  habens  pernitiosi  hominis  conatus  impedire,  ne  reipublicae  noceant.  Quod  si  vindicem  animum  tollis,  nihil  in  mandatum  illud  [OS  272]  delinquitur,  quo  ultio  Christianis  interdicitur.  At,  non  solum  vindictam  appetere  vetantur,  sed  manum  quoque  Domini  iubentur  expectare,  qui  se  oppressis  et  afflictis  adfuturum  ultorem  pollicetur  (Rom.  12).  Illam  autem  Domini  ultionem  antevertunt,  qui  opem  aut  sibi,  aut  aliis  ferri  a  magistratu  postulant.