48:24  superstitionem  traxerint.  Divinatio  enim,  quao  sortibus  fit,  prorsus  est  diabolica.  Sed  quum  magistratus  inter  se  provincias  sortiuntur,  et  fratres  haereditatem,  res  est  licita.  Idque  clare  testatur  Salomo  (Prov.  16,  33),  quum  Deum  facit  eventus  moderatorem.  In  sinum  coniiciuntur  sortes,  inquit:  et  iudicium  illarum  exit  a  Domino.  Hoc  institutum  non  magis  vitiat  corruptela  quam  genuinam  astrologiam  adulterina  Chaldaeorum  vanitas.  Chaldaei,  dum  pravae  curiositati  praetextum  captant  ex  astrologiae  nomine,  scientiam  utilem  et  laude  dignam  infamant.  Idem  faciunt  sortilegi,  quos  vocant:  sed  nostrum  est,  inter  legitimum  usum  et  corruptelam  discernere.  Caeterum,  datas  fuisse  sortes  dicit,  ut  in  urnam  vel  sinum  coniectae  postea  extraherentur.  Notandum  quoque  est,  varie  hoc  loco  accipi  sortis  nomen.  Nam  quum  prius  diceret,  Iudam  obtinuisse  sortem  ministerii,  ex  communi  scripturae  usu  intelligebat,  portionem  illi  attributam  a  Domino.  Postea  de  sorte  proprie  et  citra  figuram  loquitur.  Verisimile  tamen  est,  quum  nomen  goral  utrique  rei  commune  sit  apud  Hebraeos,  Petrum  alludere  ad  id  voluisse  quod  facturi  erant:  et  Lucam  eodem  similiter  respexisse.  Ministerii  et  apostolatus.  Quia  humile  erat  verbum  ministerii,  apostolatum  addidit,  in  quo  plus  dignitatis  in  est.  Quanquam  sensus  erit  clarior,  si  exponas  ministerium  apostolatus.  Sunt  enim  frequentes  scripturis  sanctis  hypallagae.  Certe  Lucas  cum  onere  coniungere  voluit  muneris  praestantiam,  reverentiae  et  autoritatis  conciliandae  gratia:  simul  tamen  monere,  ad  laboriosam  provinciam  vocari  apostolos.  Sors  super  Matthiam.  Ita  accidit  quod  nemo  sperasset:  hunc  enim  alteri  fuisse  posthabitum  ex  superioribus  colligere  licet.  Praeterquam  enim  quod  priorem  illi  locum  dederat  Lucas,  duo  cognomina  quibus  fuit  insignitus,  rarae  cuiusdam  existimationis  fuisse  indicant.  Barsaba,  hoc  est  filius  iurisiurandi  vel  quietis,  a  reipsa  fuit  dictus,  quasi  speculum  quoddam  esset  vel  fidelitatis  ac  innocentiae,  vel  placidi  modestique  ingenii.  Alterum  cognomen  eximiam  probitatem  notabat.  Ille  ergo  hominum  iudicio  prior:  at  Deus  illi  Matthiam  praetulit.  Unde  admonemur  non  gloriandum  esse  si  in  coelum  usque  inferamur  opinione  hominum  et  eorum  suffragiis  praestantissimi  censeamur:  sed  hoc  potius  curandum,  ut  nos  approbemus  Deo,  qui  unicus  est  legitimus  iudex,  cuius  sententia  stamus  et  cadimus.  Caeterum,  hoc  quoque  saepe  animadvertere  licet,  Deum  praeterire  qui  maxime  eminent  in  hominum  conspectu,  ut  omnem  carnis  superbiam  prosternat.  Quod  addit  conscriptum  fuisse  reliquis,  sinistram  omnem  temeritatis  notam  abstergit  a  sortitione:  quia  tanquam  divinitus  electum  amplexa  est  ecclesia,  super  quem  sors  ceciderat.