47:24  suam  confert.  Quemadmodum  hodie  si  quaeratur  quae  sint  nostrae  et  Christi  partes  in  baptismo,  fateri  oportet,  Christum  solum  praestare  quod  baptismus  figurat  :  nos  praeter  nudam  signi  dispensationem  nihil  habere.  Duplex  est  in  scriptura  de  sacramentis  loquendi  modus.  Nam  alicubi  docet  lavacrum  esse  regenerationis,  illic  ablui  peccata,  nos  inseri  in  Christi  corpus,  crucifigi  veterem  nostrum  hominem,  nos  in  vitae  novitatem  resurgere.  Ac  tunc  quidem  Christi  virtutem  hominis  ministerio  coniungit,  ut  certe  nihil  aliud  est  minister,  quam  Christi  manus.  Quare  eiusmodi  loquutiones,  non  quid  per  se  conferat  homo,  sed  quid  per  hominem  et  signum,  tanquam  sua  organa,  efficiat  Christus,  ostendunt.  Verum  quia  proclivis  est  in  superstitionem  lapsus,  deinde  homines  pro  ingenita  sibi  superbia  ereptum  Deo  honorem  ad  se  rapiunt,  ideo  scriptura  ut  sacrilegam  hanc  insolentiam  compescat,  ministros  interdum  a  Christo  discernit,  ut  hoc  loco,  ut  sciamus  nihil  ministros  esse.  vel  posse.  Medius  inter  vos.  Eorum  socordiam  oblique  perstringit,  fyuod  Christum  ignorent,  ad  quem  maxime  animos  advertere  debebant.  Ac  semper  hoc  sedulo  inculcat,  nihil  de  suo  ministerio  posse  cognosci  donec  ad  autorem  ipsum  ventum  fuerit.  Dicit  Christum  inter  eos  medium  stare,  ut  ad  eum  cognoscendum  studia  excitet.  Summa  autem  huc  redit,  ut  se  deiiciat  quantum  fieri  potest,  ne  qua  in  parte  honor  illi  perperam  delatus  Christi  praestantiam  obscuret.  Probabile  autem  est  has  illi  sententias  frequentes  fuisse  in  ore,  quum  videret  se  immodice  perversis  hominum  iudiciis  extolli.  27.  Qui  post  me  veniens.  Duo  hic  dicit,  Christum  a  se  tempore  quidem  secundum,  sed  gradu  dignitatis  longe  priorem  esse,  quia  pater  illum  omnibus  praetulerit.  Tertium  paulo  post  addet,  Christum  ideo  aliis  omnibus  praepositum  esse,  quia  iure  alios  omnes  antecellit.  28.  Haec  in  Bethabara.  Loci  notatio  non  tantum  ad  fidem  historiae  spectat,  sed  etiam  ut  sciamus  in  celebri  hominum  conventu  datum  fuisse  hoc  responsum.  Multi  enim  ad  Ioannis  baptismum  confluebant,  hic  autem  ordinarius  illi  ad  baptizandum  locus  erat.  Et  putant  fuisse  Iordanis  traiectum  :  unde  et  nomen  deducunt,  nam  interpretantur  domum  transitus.  Nisi  forte  eorum  opinio  magis  placeat,  qui  ad  memorabilem  populi  transitum  hoc  referunt,  quum  Deus  per  medias  aquas  viam  sub  Iosua  patefecit  (Ios.  3,  13).  Alii  legendum  potius  iudicant  Betharaba.  Bethaniae  nomen  inscite  hic  a  quibusdam  positum  fuit.  Nam  postea  videbimus  quam  vicina  Hierosolymae  fuerit  Bethania.  Bethabarae  autem  situs,  quem  topographi  describunt,  optime  cum  evangelistae  verbis  convenit.  Quanquam  de  vocis  pronuntiatione  non  contendo.