43:24  Acriter  enim  exagitabit  onines  illorum  superstitiones,  sed  id  faciet  suo  loco.  Nunc  autem  opus  fuit  a  notis  principiis  incipere,  et  hoc  erat  longe  commodius,  quia  si  initio  loquutus  esset  de  superstitionibus,  dixissent  se  tamen  Deum  colere.  Maluit  igitur  damnare  ipsos  Iudaeos,  quod  alienati  fuerint  a  puris  Dei  mandatis.  Quantum  ad  Israelitas  spectat,  hic  coarguit  crassa  scelera  in  ipsis.  Ubi  autem  convicti  fuerint  crudelitatis,  impudicitiae,  rapacitatis,  multarum  libidinum:  ubi  ergo  foeditates  istae  detectae  fuerint,  iam  locus  erit  multo  opportunior  clamandi  contra  superstitiones.  Hunc  ordinem  consulto  servat  propheta  noster,  quemadmodum  melius  ex  contextu  videbimus,  Iam  redeo  ad  verba  ipsa.  Dicit  ergo  fuisse  venditum  iustum  argento,  et  pauperem  pro  calceamentis.  Significat  nihil  fuisse  iuris  vel  aequitatis  apud  Israelitas,  quia  filios  Dei  venales  habebant  Hoc  autem  valde  indignum  est,  quod  nullum  sit  remedium  iniuriis.  Nam  facile  colligere  licet,  prophetam  hic  stylum  stringere  contra  ipsos  iudices,  qui  rerum  tunc  potiebantur:  dicit  venditum  fuisse  iustum  argento,  hoc  non  potest  competere  in  homines  privatos,  sed  proprie  aptatur  ipsis  iudicibus,  quorum  munus  erat  porrigere  manum  miseris  et  pauperibus,  ulcisci  etiam  iniurias,  et  ius  suum  cuique  tribuere.  Ergo  perinde  est  ac  si  dixisset  propheta  regnare  apud  Israelitas  effraenem  licentiam,  ita  ut  iusti  homines  expositi  sint  praedae,  et  sint  quasi  venales.  Primum  dicit  eos  venire  pro  argento,  tandem  addit  pro  calceamentis.  Et  hoc  diligenter  notandum  est,  quia  ubi  semel  deflectere  coeperint  homines  a  recto  cursu,  prostituunt  se  absque  ullo  pudore.  Initio  si  quis  adoriatur  virum  iustum  et  integrum,  et  immunem  a  corruptelis,  non  statim  vincetur,  etiamsi  oblatum  fuerit  magnum  pretium,  constabit  tamen  sibi:  sed  ubi  decem  aureis  vendiderit  fidem  suam,  postea  venalis  erit,  quemadmodum  solent  mulieres.  Mulier  quae  est  adhuc  integra  non  poterit  tam  facile  abduci  a  fide  coniugali:  poterit  tamen  corrumpi  magno  pretio:  tandem  se  prostituet,  ita  ut  frusto  panis  venalis  sit.  Idem  etiam  cernitur  in  ipsis  iudicibus.  Qui  ergo  initio  argentum  appetunt,  hoc  est,  qui  corrumpi  non  possent  nisi  opima  et  pingui  praeda,  postea  etiam  vilissima  mercede  fidem  suam  proiicient.  Nullus  enim  amplius  in  his  residuus  est  pudor.  Hoc  propheta  notat  his  verbis,  quod  iustum  vendiderint  argento,  hoc  est,  addixerint  pretio:  deinde  quod  etiam  vilissima  mercede  corrupti  fuerint,  nempe  si  quis  offerret  par  calceamentorum,  illos  absque  verecundia  ultro  ire  obviam  ad  captanda  spolia:  ita  ut  iugularent  etiam  innocentissimos  quosque.  Nunc  ergo  videmus  quod  crimen  accuset  Amos  in  Israelitis.  Non  poterant  hic  quidquam  obiicere,  quemadmodum  si  de  superstitionibus  ipsorum  verba  fecisset.  Voluit  igitur  autoritatem  acquirere  in  istis  manifestis  criminibus