41:24  Quoniam  autem  necesse  est  multa  discrimina  hinc  inde  a  nobis  conspici  (undique  enim  a  centum  mortibus  obsidemur)  ideo  miserrima  inquietudine  vexaremur,  nisi  hoc  nobis  succurreret,  non  tantum  vitam  nostram  custodiri  a  Deo,  sed  nihil  esse  noxae,  quod  non  ipse  dirigat  pro  arbitrio  suo  et  nutu.  Hoc  porro  etiam  extendi  debet  ad  diabolos  ipsos,  et  improbos  ac  sceleratos  homines.  Nam  scimus  diabolum  semper  satagere  de  nobis  perdendis,  et  similem  esse  leoni  rugienti.  Cursitat  enim,  ac  quaeritat  praedam,  quam  devoret,  sicut  dicit  Petrus  priore  sua  epistola  (5,  8).  Videmus  etiam  ut  omnes  impii  nobis  in  singula  momenta  mortem  machinentur,  et  quanto  furore  contra  nos  ardeant.  Sed  Deus  qui  potest  compescere  ora  leonum,  simul  etiam  diabolum  fraenabit  et  omnes  sceleratos,  ne  quid  nobis  nisi  eius  permissu  noceant.  Imo  experientia  docet,  et  diabolum,  et  omnes  impios  ab  ipso  comprimi.  Singulis  enim  momentis  pereundum  nobis  esset,  nisi  opposita  sua  virtute  repelleret  innumeras  noxas,  quae  capitibus  nostris  impendent.  Sciamus  ergo  singulari  Dei  beneficio  fieri,  quod  vel  diem  unum  incolumes  manemus  in  tanta  hostium  nostrorum  ferocia  et  rabie.  Dicit  autem  Daniel  nihil  sibi  damni  vel  iacturae  allatum  fuisse  a  leonibus,  quia  coram  Deo  inventa  fuerit  in  se  iustitia.  Quibus  verbis  significat  ideo  se  fuisse  servatum,  quia  Deus  voluit  asserere  gloriam  suam,  et  cultum  quem  lege  sua  praeceperat.  Neque  enim  iactanter  hic  propheta  iustitiam  suam  extollit,  sed  potius  ostendit  ideo  se  fuisse  liberatum,  quia  Deus  voluerit  certo  et  claro  documento  testari,  probari  sibi  cultum  illum,  pro  quo  pugnaverat  Daniel  usque  ad  mortem.  Videmus  ergo  ut  Daniel  omnia  ad  cultus  Dei  approbationem  referat.  Summa  est,  se  piae  et  sanctae  causae  fuisse  patronum,  et  paratum  fuisse  ad  obeundam  mortem  non  stulta  aliqua  imaginatione,  non  temerario  impulsu,  nec  confuso  zelo,  sed  quia  certo  persuasus  erat  se  colere  vivum  Deum.  Quoniam  ergo  piae  et  sanctae  causae  fuit  defensor,  ideo  dicit  se  fuisse  servatum.  Haec  est  summa.  Hinc  colligere  promptum  est,  quam  stolidi  sint  papistae,  qui  ex  hoc  loco  et  similibus  adstruere  conantur  operum  iustitiam  et  merita.  O,  Daniel  fuit  servatus,  quia  inventa  est  coram  Deo  iustitia  in  ipso:  Ergo  Deus  rependit  cuique  pro  operum  meritis.  Atqui  primo  reputandum  erat  consilium  Danielis.  Neque  enim,  ut  iam  dixi,  iactat  sua  merita:  sed  vult  salutem  sibi  divinitus  oblatam,  testimonium  esse  veri  et  puri  cultus,  ut  pudefaciat  regem  Darium,  et  ostendat  omnes  superstitiones  esse  impias,  praesertim  ut  admoneat  de  sacrilego  illo  edicto,  quoniam  sibi  arrogaverat  summum  imperium:  ita  ut  aboleret,  quantum  in  se  erat,  omnem  deitatem.  Ut  ergo  Darium  admoneat  propheta,  ideo  dicit  causam  suam  fuisse  iustam.  Et  quo  facilior  sit  solutio,  notandum  est,