39:24  nihil  ad  ipsos  pertineat.  Deus  ergo  hic  priore  loco  de  vindicta  sua  disserit,  ut  horrorem  incutiat  legis  suae  contemptoribus,  et  significet  eos  excludi  a  redemptionis  gratia.  Postea  adiungit  se  tandem  propitium  fore  exsulrbus:  sed  restringitur  gratia  illa  ad  solos  electos  et  fideles.  Notandae  igitur  sunt  duae  partes  responsi,  quia  videtur  hic  Deus  res  contrarias  inter  se  opponere.  Sed  quemadmodum  iam  dixi,  priore  membro  respicit  hypocritas,  qui  ad  se  trahebant  sine  fide  et  resipiscentia  quod  prophetae  testati  fuerant  de  reditu.  Ergo  hic  Deus  extremam  severitatem  in  medium  proponit:  deinde  mitigat  illam  duritiem,  sed  tunc  convertit  sermonem  ad  suos  electos,  quia  capaces  erant  huius  gratiae.  Veniamus  nunc  ad  verba,  Ego  trado  urbem  hanc  in  manum  Chaldaeorum,  et  regis  Nabuchadnezer,  et  capiet  eam.  Vult  fixum  manere  quod  Ieremias  ipse  ex  eius  mandato  praedixerat,  nempe  urbem  non  posse  eripi.  Nam  poterat  hoc  turbare  prophetae  animum,  ac  si  paulo  post  liberandi  essent  Iudaei,  et  solvenda  esset  urbis  obsidio:  ita  derisus  fuisset  cum  suis  vaticiniis,  et  obiecta  temeritas,  quod  ausus  fuisset  denuntiare  ex  ore  Dei  quod  ante  vidimus.  Hac  ratione  et  hoc  consilio  Deus  asserit  nihil  posse  mutari  quin  Chaldaei  urbem  capiant,  et  ita  iubet  prophetam  securo  esse  animo,  nec  ideo  cruciari,  ac  si  vellet  subiicere  ludibrio  eius  vaticinia.  Nam  hoc  etiam  modo  expositum  fuisset  sacrum  Dei  nomen  multis  probris.  Si  enim  convictus  fuisset  falsitatis  Ieremias,  quid  restabat  nisi  ut  Iudaei  petulanter  Deo  insultarent?  Ergo  iterum  pronuntiat  Deus  urbem  addictam  esse  excidio:  et  ideo  adiungit,  Ingredientur  Chaldaei  qui  oppugnant  urbem.  Nam  non  dicit  venturos,  sed  confirmat  aliis  verbis  eandem  sententiam.  Perrumpent  igitur  Chaldaei  in  urbem  quae  videtur  clausa  et  munita  esse:  et  accendent  urbem  hanc.  Non  frustra  etiam  inculcat  saepius  nomen  urbis,  quia  quum  esset  sacrarium  Dei,  et  regia  sedes,  putabant  Iudaei  esse  inexpugnabilem,  et  potius  solem  posse  eripi  e  coelo,  quam  ut  hostes  potirentur  illa.  Ergo  ut  perversam  hanc  confidentiam  refutet  Deus,  saepius  ponit  urbis  nomen.  Tandem  adiungit,  Et  ingredientur  Chaldaei,  et  succendent  urbem  igni,  et  exurent  eam:  quasi  diceret  certum  fore  quidquid  praedixerat  Ieremias,  non  tantum  de  urbis  oppugnatione,  sed  etiam  excidio,  ita  ut  non  maneret  lapis  supra  lapidem,  quin  illic  esset  horribilis  vastitas  usque  ad  tempus  restitutionis.  Reliqua  in  crastinum.  Proxima  lectione  non  absolvi  sententiam,  ubi  denuntiabat  propheta  urbem  fore  obnoxiam  incendio.  Postquam  enim  illic  de  urbe  loquutus  est,  simul  etiam  adiunxit  domos  super  quas  suffitum  fecerant  suis  idolis,  et  libarant  libamina.  Causam  igitur  exprimit  cur  tam  gravis  Dei  vindicta  maneat  urbem